გუშინ ალპინისტი და სამთო გიდი, ნიკოლოზ ფალიანი, უშბაზე ექსპედიციის დროს, ტრაგიკულად დაიღუპა.
ტრაგედიის დეტალებზე მისმა მეგობარმა, შაკო მარგიანმა AMBEBI.GE-სთან ისაუბრა.
„როგორც გავიგეთ, ყინულის ნატეხზე წამოედო თხილამური, რამაც ნიკოს კონტროლი დააკარგვინა. იქ დაახლოებით 45 გრადუსის ფერდია, სადაც ზურგით თუ დაეცი, ნულია შანსი, ვერ შემოტრიალდები, მიდიხარ, ეშვები. ასე დაემართა ნიკოს, გასძვრა თხილამურიც და ჩაფხუტიც, დაახლოებით 350 ვერტიკალი იფრინა, რაც სიგრძეში დაახლოებით 800 მეტრამდეა. გადარჩენის შანსი არ იყო. ნიკოს „რედბულის“ ათლეტები ახლდა, რომლებიც სამთო სპორტში მსოფლიოში ყველაზე გამოცდილები არიან (შვეიცარია-ავსტრიის ნაკრებია). ნიკოს 3 მოთხილამურე ახლდა, დანარჩენი ოპერატორები იყვნენ, რომლებიც ფერდიდან იღებდნენ სრიალს, მათ ნიკოს ძმა – ზურა ახლდათ, რომელიც ოპერატორების უსაფრთხოებაზე ზრუნავდა. ძმამ საკუთარი თვალით უყურა ამ ყველაფერს…“, – თქვა მარგიანმა.