“მე ჟურნალისტი ვარ და არ მიყვარს, როცა მხარეს წარმოვადგენ, მაგრამ ახლა ის დროა, როცა უნდა იყო მხარე. მეორე მხარეს დგანან აი, ის ადამიანები, რომლებიც ჩვენ დღეს ვიხილეთ – ბრბო, სამწუხაროდ, ეს არის ბრბო.
ბრბო, როცა ქვეყნის მართვას იწყებს, იმ ქვეყანას მომავალი არ აქვს” – ამის შესახებ ჟურნალისტმა მაია ასათიანმა გადაცემაში “მთავარი აქცენტები” სტუმრობისას განაცხადა, რომლითაც ის რუსთავის N12 პენიტენციურ დაწესებულებასთან მიხეილ სააკაშვილისა და “ნაციონალური მოძრაობის” მოწინააღმდეგეების მიერ გამართულ აქციას გამოეხმაურა.
ასათიანმა ქვეყანაში არსებული პოლიტიკური ვითარება შეაფასა და აღნიშნა, რომ “საქართველო სიბნელეშია”.
“მე არ მომწონს, როცა ჩემი ხელისუფლება (ის ჩემი ხელისუფლებაც არის, რადგან ამ ქვეყნის მოქალაქე ვარ) დამცინის, აბუჩად მიგდებს, ძველბიჭური ტერმინოლოგიით მესაუბრება, მე ეს არ დამიმსახურებია, ამ ქვეყნის მოქალაქე ვარ, აქ მინდა სიბერე, სიკვდილი და “ძმაო” და “ე, გოგო, დაოთი” ლაპარაკი მათ არ ეკადრებათ ჩვენს მიმართ.
ახლა ვიცი მომესევიან, არავინ უარყოფს, რომ შეცდომები იყო, მაგრამ გააღეთ ფანჯრები, გაიხედეთ გარეთ და შეხედეთ ახლანდელ საქართველოს. ჩემი შვილის დაბადების დღეა, ჩემთვის უმძიმესი დღე და დღეს, აქ ზუსტად იმიტომ მოვედი, რომ ეს მეთქვა და გაიხსენეთ, ვითომ 2003 წლის 25 ოქტომბერია, გადაავლეთ თვალი თქვენს ცხოვრებას და მიხვდებით რა უნდა გააკეთოთ, დღესაც, ხვალაც და არჩევნებზეც, იმიტომ, რომ სიბნელეში ვართ, იქით მხოლოდ დასასრულია,” – განაცხადა მაია ასათიანმა “მთავარი არხის” ეთერში საუბრისას.