„მოქალაქეები – ძლიერი საქართველოს“ ერთ-ერთმა ლიდერმა, ალეკო ელისაშვილმა „პალიტრანიუსის“ გადაცემაში “საგამოძიებო კომისიაზე” ისაუბრა და განაცხადა, რომ პარლამენტში შექმნილი საგამოძიებო კომისია, სახელმწიფო ღალატის კომისიაა.
ელისაშვილის თქმით, თუკი მას “საგამოძიებო კომისიაზე” დაიბარებენ, ის ერთ თეთრსაც არ გადაიხდის.
“მიგვიფურთხებია მაგ კომისიისთვის, ჩვენი კოალიციის ლიდერები იყვნენ პირველები, რომლებმაც უარი თქვეს მაგ კომისიაში მისვლაზე და სილა გააწნეს – წულუკიანის თამადობით, კომისიის წევრებს სამშობლოს ღალატისთვის გავამწესებთ სადაც საჭიროა – ციხეში.
თუ აპირებენ, რომ დამიბარონ, იცოდნენ, რომ ერთი თეთრის გადამხდელი არ ვარ, მოღალატეები არიან. მოვა დრო, როცა ციხეში მივაკითხავ და მჟავე მაწონს მივუტან წულუკიანს, უმსგავსო სოზარს, დეგრადირებულ ადამიანს. კარგი მაწონი რატომ უნდა მივუტანო? მჟავე მაწონი და გამხმარი “ბულკები” უნდა მივუტანო, რომ მერე ღრღნან. როგორ დეგრადირდა სოზარ სუბარი, გათახსირდა, რასაც მთელი ცხოვრება აკეთებდა – იმას ებრძვის, თავის წარსულს ებრძვის, სოზარს მჟავე მაწონსაც არ მივუტან.
ისე ღრმად შეტოპეს, რომ მათი მხრიდან ნებისმიერი კომპრომისული ნაბიჯი, მათი დაფშვნის წინაპირობაა, მათ თავიანთი თავი ამ სიტუაციაში თავად შეიყვანეს, მაგრამ კომპრომისული ნაბიჯების გადადგმა მოუწვეთ“, – განაცხადა ალეკო ელისაშვილმა.