„კოალიცია ცვლილებისთვის“ ლიდერმა, ნიკა მელიამ ბრიფინგზე 26 მაისის მნიშვნელობისა და ადგილობრივ არჩევნებში მონაწილეობის საკითხის შესახებ ისაუბრა.
მისი თქმით, „პოლიტიკური ორაზროვნების დრო დასრულდა, დადგა დრო, გაეცეს პასუხი კითხვას, შევდივართ თუ არა ფარსში, სახელად ადგილობრივი არჩევნები.“
„26 მაისი ისტორიული მნიშვნელობის დღე, რომელსაც ამჟამინდელმა ვითარებამ ახალი და დამატებითი ფუნქცია შესძინა. გვაკისრია ვალდებულება, ვიბრძოლოთ დამოუკიდებლობის შენარჩუნებისთვის, რადგანაც ქვეყნის სუვერენიტეტს და მის მისწრაფებას განვითარებული მსოფლიოსკენ, კვლავაც არყევს რეჟიმის ანტიქართული პოლიტიკა. პოლიტიკური ბუნდოვანების დრო დასრულდა. დადგა დრო, რომ პოლიტიკური ორაზროვნება დასრულდეს და პოლიტიკური მკაფიოობის დრო დადგა, ანუ დადგა დრო ყველა კითხვაზე პასუხის გაცემისა, კერძოდ რას ვაკეთებთ, შევდივართ თუ არა ფარსში სახელად ადგილობრივი არჩევნები. პასუხი უნდა გაეცეს ძალიან მკაფიოდ. ჩემი პასუხი მათ, ვინც ამ ეტაპზე, ბევრი მიზეზის გამო პასუხს არ ან ვერ ცემს. ვიმედოვნებ, რომ საბოლოო ჯამში ყველას გვეყოფა კეთილგონიერება, კეთილსინდისიერება და პოლიტიკური ალღო. ჩემი პასუხი ყველა ასეთ სუბიექტს. მე არასდროს მითქვას უარი არჩევნებზე. არჩევნები გააუქმა “ქართულმა ოცნებამ” და შენ ვერ შეხვალ იქ, რაც არ არსებობს და იქ შესვლით არარსებულის ლეგიტიმაციაა და არა უბრალოდ ძალიან ცუდი ხარისხის ჩატარებული არჩევნებისა.
ამ ეტაპზე მნიშვნელოვანია, რომ ამ კონკრეტულ კითხვას პასუხი გაეცეს, ვინაიდან გაყალბებული არჩევნების შემდეგ, ყველა პოლიტიკურმა პარტიამ გადავწყვიტეთ და შევედით ბოიკოტში და ამით ხალხი დარწმუნდა, რომ ბრძოლა ღირს ბოლომდე. ეს ბრძოლა მიმდინარეობს ბოლომდე, პროტესტი არის ურყევი და ქვეყანას ჰყავს 50- მდე პოლიტიკური პატიმარი.
მე ძალიან დიდი იმედი მაქვს, რომ 6 დღეში 26 მაისს ყველა პოლიტიკური სუბიექტი, თუ ცალკეული ადამიანი, ვისაც ევალება და ვინც ვალდებულია საზოგადოების წინაშე ამ კითხვაზე გასცეს პასუხი და ამით არ დაემსგავსება 26 მაისი, 31 მარტს, ვინაიდან ძალიან მჯერა, რომ არათავსებადია ერთმანეთთან იყო უკომპრომისო ბრძოლაში და ამავე დროს სერიოზულად განიხილავდე 4 თვით ადრე ე.წ. ადგილობრივ არჩევნებში შესვლას. ისმის კითხვა, რა არის გემა ბოიკოტის შემდეგ, პასუხი თავად ბოიკოტი არის გეგმა. პოლიტიკური არა თანამშრომლობა არის გეგმა, საერთაშორისო იზოლაციის გაღრმავება არის გეგმა. საზოგადოება იმსახურებს მკაფიოდ და გულწრფელად ვთქვათ, რომ გვინდა შესვლა – ესეც პასუხია“, – განაცხადა მელიამ.