„ურტყამს თავში, ჩემი შვილი ეცემა უგონოდ…” – არსებული ინფორმაციით, გუშინ, თბილისში ნაცემი ახალგაზრდა კომაშია

თბილისში, გასულ ღამეს, 31 წლის ახალგაზრდას, ბექა ონიანს, სცემეს.

არსებული ინფორმაციით, უმძიმესი დაზიანებები თავის არეში ბექა ონიანს პოლიციელის შვილმა მიაყენა.

ამ დროისათვის ბექა ონიანი ხელოვნურ კომაშია.

„ჩემი შვილი არის ფუტსალის დინამოს მოთამაშე, გუშინ ჰქონდათ თამაში თსუ-ის გუნდთან. თამაშის დროს სიტყვიერი შელაპარაკება მოხდა მოთამაშეებს შორის, ამის შემდეგ, მოწინააღმდეგე გუნდის თსუ-ის ფიზმომზადების მწვრთნელი დაელოდა პარკინგზე, ეს ყველაფერი მოხდა ახალ სპორტის სასახლეში, უნივერსიტეტის ქუჩაზე. ნახა მარტო, კამერები ამოღებულია და როგორც ვიცი, კამერაში ჩანს, როგორ მიდის ეს პიროვნება, ურტყამს ხელს. არ ჩანს, მაგრამ ტრავმა ისეთია მიღებული, რომ ცარიელი მუშტით ასეთ ტრავმას ვერ მიაყენებდა. ურტყამს თავში, სავარაუდოდ უჭირავს ბლაგვი საგანი, ჩემი შვილი მოწყვეტით ეცემა უგონოდ და ის ტრიალდება, ჯდება მანქანაში და მიდის.

ეს არის ივა ტყეშელაშვილი, თსუ-ის ფიზმომზადების მასწავლებელი და ინფორმაციები როგორიც გვაქვს, პოლიციელის შვილია. არაერთხელაა მსგავს კონფლიქტებში შემჩნეული , რაც სხვაგან ადრე გასვლია“, – ამბობს ნაცემი ახალგაზრდას დედა, ნინო შერმადინი „მთავართან“ ინტერვიუში.