საკონსტიტუციო სასამართლომ 21 ოქტომბერს მიიღო გადაწყვეტილება „ევროპული საქართველოს“ სარჩელზე გენდერულ კვოტებთან დაკავშირებით.
პარტია გენდერული კვოტების არაკონსტიტუციურად ცნობას ითხოვდა, თუმცა საკონსტიტუციო სასამართლომ ეს სარჩელი არსებით განხილვაში არ მიიღო.
ამასთან, საკონსტიტუციო სასამართლომ დამატებით მიიღო გადაწყვეტილება, გააუქმოს საარჩევნო კოდექსის ის მუხლი, რომელიც მუნიციპალური არჩევნებისთვის საარჩევნო სიებში ყოველ სამეულში სულ მცირე, ერთი კაცის ჩასმის აუცილებლობას აწესებდა.
ამასთან, საკონსტიტუციოს განჩინებით, გაუქმდა საარჩევნო კოდექსის ის მუხლიც, რომელიც პროპორციული საარჩევნო სისტემით არჩეული საკრებულოს წევრი კაცის უფლებამოსილების ვადამდე შეწყვეტის შემთხვევაში, ადგილმონაცვლედ ითვალისწინებდა პარტიულ სიაში მყოფ მომდევნო კაცს.
განჩინება უკვე ძალაშია და, როგორც სასამართლო წერს, „საბოლოოა და გასაჩივრებას ან გადასინჯვას არ ექვემდებარება“.
აღნიშნულ საკითხს ქალთა უფლებადამცველი ბაია პატარაია სოციალურ ქსელში ეხმაურება:
“თაგვმა თხარა, თხარაო, კატა გამოთხარაო” დაემართა ევსაქბეს+ჩერგოს.
საკონსტიტუციომ ის ხარვეზიც კი გამოასწორა, რაც კვოტებს ჰქონდა და თქვა, რომ კაცებზე საერთოდ არ უნდა ვრცელდებოდეს კვოტირება. ქალს უნდა შეეძლოს გამოთავისუფლებული კაცის ადგილის დაკავება, თუ სიით უწევს, ხოლო, ქალი კი აუცილებლდ ქალით უნდა ჩანაცვლეს სიაში.
გულწრფელი მადლობა, მეც ხარვეზად მიმაჩნდა კაცების შემოტენვა კვოტებში და მაგ ცვლილებებზე ვმუშაობდით. საქმე გაგვიიოლეთ ფაქტობრივად.well done. მაგას რა ჯობია, როცა მავნებლობ და უეცრად კარგი საქმე გამოგივა?!”, – წერს პატარაია “ფეისბუქის” პირად გვერდზე.