“მაგათთან ხუმრობა არ შეიძლება…” – რა განაცხადა ირაკლი ოქრუაშვილმა დაკავებამდე

“ხილვა მქონდა, ვიღაცამ ჩამომძახა, გირაო არ გადაიხადოო.
ვინ ხარ-მეთქი და “დიფ სთეითი” ვარო.
მაგათთან ხუმრობა არ შეიძლება, ამიტომ არ გადავიხადე...” – ასე გამოეხმაურა თავდაცვის ყოფილი მინისტრი, ირაკლი ოქრუაშვილი მის სასამართლო პროცესს დაკავებამდე რამდენიმე წუთით ადრე.

შეგახსენებთ, რომ ირაკლი ოქრუაშვილს გირაოს გადაუხდელობის გამო პატიმრობა შეეფარდა.

საქმე ეხება “საგამოძიებო კომისიას”, სადაც ოქრუაშვილი 26 მარტს იყო დაბარებული, თუმცა მან მისვლაზე უარი განაცხადა.

ირაკლი ოქრუაშვილს “საგამოძიებო კომისიაზე” გამოუცხადებლობისთვის, 8 აპრილს, აღკვეთი ღონისძიების სახით 20 000-ლარიანი გირაო შეეფარდა და საზღვრის კვეთა აეკრძალა. ოქრუაშვილს გირაოს გადახდის ვადად 30 დღე განესაზღვრა, რომელიც 8 მაისს ამოიწურა.

ირაკლი ოქრუაშვილს ბრალდება სისხლის სამართლის კოდექსის 349-ე მუხლით წარედგინა, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს. ეს ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.