„რაღაც სამი თითი ნიკაპზე მოგხვდა და ქვეყანა შეყარე, რომ მეტკინა, ლოყა ამიწითლდა და [ქალი] 6 წლით ციხეში უნდა ჩავსვაო – ეს არის მორალური კატასტროფა“ – ნაირა გელაშვილი ირაკლი დგებუაძეზე

მწერალმა ნაირა გელაშვილმა „მაუწყებლის” პოდკასტში „ბათუმელებისა“ და ნეტგაზეთის“ დაპატიმრებული დამფუძნებლის, მზია ამაღლობელის საქმის შესახებ ისაუბრა.

მან გააკრიტიკა ბათუმის პოლიციის ხელმძღვანელი, ირაკლი დგებუაძე, რომელზე თავდასხმის ბრალდებითაც არის დაკავებული ამაღლობელი.

„ქალმა სილა გამაწნაო და ამაზე კაცი ჩივის, პირველ რიგში ხომ კაცი ხარ, ვიდრე პოლიციელი გახდები, პირველ რიგში ხომ ადამიანი ხარ, რანაირად შეიძლება, დასუსტებული ქალი, რომელსაც მანამდე შენ შეურაცხყოფას აყენებდი, ამცირებდი ყველანაირად და ღირსებაშელახულმა დასუსტებული ხელი გამოგიქნია და რაღაც სამი თითი ნიკაპზე მოგხვდა და ქვეყანა შეყარე რომ მეტკინა, ლოყა ამიწითლდა ამიტომ უნდა ვუჩივლო და 6 წლით ციხეში ჩავსვა, ვისაც ეს არ ესმის, რა კატასტროფაა მორალური..
სირცხვილის განცდა არ აქვთ, ეს ნიშნავს, რომ ამ კაცში მამაკაცური თვითშეგნება არის განადგურებული”, – განაცხადა მწერალმა ნაირა გელაშვილმა.

შეგახსენებთ, გუშინ ამაღლობელის მორიგი სასამართლო პროცესი გაიმართა, სადაც დგებუაძე გამოკითხა. მან თქვა, რომ მზია ამაღლობელის მიერ სილის გაწვნის შედეგად, ტკივილი განიცადა.

მზია ამაღლობელი 2025 წლის 11 იანვარს დააკავეს

მას ბრალი სისხლის სამართლის კოდექსის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს. მას 4-დან 7 წლამდე პატიმრობა ემუქრება.