32 წლის ნიკა ბასილაძე და მისი ოჯახი ქუთაისის ციხის ადმინისტრაციას არაადამიანურ მოპყრობაში ადანაშაულებს.
ბასილაძე, 8 თვიანი მკურნალობის შემდეგ, კლინიკა “ვივა-მედიდან” 10 დღის წინ გაწერეს, თუმცა ახალგაზრდა კაცი დამოუკიდებლად ვეღარ გადაადგილდება.
მისი ოჯახის ინფორმაციით, 2024 წლის 24 აგვისტოს პატიმარი ქუთაისის ციხის მაღალჩინოსნებმა ჯერ სცემეს, შემდეგ კი თვითმკვლელობის მცდელობის ინსცენირება მოაწყვეს.
მათივე თქმით, 32 წლის პატიმარს მძიმე დაზიანებები ქუთაისი ციხის რეჟიმის უფროსმა და საბადრაგოს სამსახურმა მიაყენა, თუმცა პასუხი არავის უგია, რადგან დოკუმენტები გააყალბეს და თქვეს რომ პატიმარმა დაზიანებები თავად მიიყენა, როცა თავს იკლავდა.
“დომინოს თამაშობდნენ, [ციხის თანამშრომლებმა] შემოუსწრეს და ჩხუბი დაუწყეს ნიკას. ამ ჩხუბში ტილოში გახვეული ბლაგვი საგანი ჩაარტყეს, რომ თავი არ გასკდომოდა, ამის შემდეგ გაითიშა, ამ გათიშულს შემდეგაც ურტყეს, დაუშალეს ფაქტობრივად თვალი, ცხვირი, შუბლის ძვლები გატეხილი ჰქონდა. ნახევარი თავი არ აქვს – “პლასტმასი” აქვს ჩადგმული. მარჯვენა მხარეს რომ დაარტყეს, ბზარი მარცხენა მხარეს, თვალთან გამოუვიდა.
ესეც არ ეყოთ, ტუალეტში შეიყვანეს, ვიდეოთვალი გათიშეს, ვენები გადაუხსნეს [ერთ ხელზე ორ ადგილზე, მეორეზე ერთხელ]. ამის შემდეგ ფეხზე წამოაყენეს… ციხის უფროსი მეუბნება, რომ უნიტაზზე იჯდაო. ექიმს რომ ვუთხარი, “უნიტაზი ალბათ, მეათე სართულზე იყოო” – ამბობს ტვ პირველთან ყოფილი პატიმრის მამა, ბეჟან ბასილაძე.