ქალაქში ახალი, სიცოცხლისთვის უკიდურესად საშიში ნარკოტიკული ნივთიერება გავრცელდა – ამის შესახებ მოსახლეობას ნარკოლოგი ზურა სიხარულიძე აფრთხილებს.
სპეციალისტის თქმით, ბოლო დღეებში გავრცელებული პრეპარატი მომხმარებლებს კოკაინის სახელით მიჰყიდებათ, თუმცა მისი შემადგენლობა გაცილებით საშიშია.
“ბოლო პერიოდში ქალაქში გამოჩნდა ძვირად ღირებული ნარკოტიკული ნივთიერება, რომელიც კოკაინის სახელით ვრცელდება. თუმცა, რამდენიმე მომხმარებლის ჯანმრთელობის გაუარესებისა და ლეტალური შემთხვევების საფუძველზე, არსებობს ეჭვი, რომ პროდუქტი არ წარმოადგენს ნამდვილ კოკაინს”, – აცხადებს სიხარულიძე.
მისივე განმარტებით, სავარაუდოდ, საქმე გვაქვს მეტადონის კრისტალებისა და ფენტანილის ნარევთან – ეს კომბინაცია კი შეიძლება მომწამვლელი აღმოჩნდეს და მძიმე შედეგები გამოიწვიოს, მათ შორის სავალალო.
ნარკოლოგი საზოგადოებას სიფრთხილისკენ მოუწოდებს:
“გთხოვთ, მაქსიმალური ყურადღება გამოიჩინოთ და გაავრცელოთ ეს ინფორმაცია. მნიშვნელოვანია, რომ მსგავსი საშიში ნივთიერებების შესახებ იცოდეს ყველამ – განსაკუთრებით ახალგაზრდებმა. ასე შეგვიძლია თავიდან ავიცილოთ გაუგონარი ტრაგედიები.”
სიხარულიძის თქმით, ასეთი შემთხვევების პრევენცია მხოლოდ საზოგადოებრივი ჩართულობითა და ინფორმირებულობით არის შესაძლებელი.