Globalnews-მა ამერიკის სახელმწიფო დეპარტამენტს შტატებში, ლევან დავითაშვილთან შეხვედრის თაობაზე კითხვა დაუსვა.
კითხვაზე – „მოქმედი ადმინისტრაციის პირობებში, საქართველოს მმართველი პარტიის პრემიერთან პირველი შეხვედრები გაიმართა. შეგიძლიათ ამ შეხვედრის დეტალები გაგვიზიაროთ, რა ძირითადი საკითხები განიხილეთ და ასევე, რა იყო სახელმწიფო დეპარტამენტის პოზიცია შეხვედრისას?“
სახელმწიფო დეპარტამენტის პასუხი ასეთია:
„დახურულ დიპლომატიურ საუბრებზე კომენტარს არ ვაკეთებთ. შეერთებულმა შტატებმა ნათლად აჩვენა, თუ რა ნაბიჯების გადადგმა შეუძლია საქართველოს მთავრობას, რათა დაამტკიცოს, რომ იგი სერიოზულადაა განწყობილი შეერთებულ შტატებთან ურთიერთობის გაუმჯობესების კუთხით.“
შეგახსენებთ, ლევან დავითაშვილი ვაშინგტონში გასულ კვირას, საერთაშორისო სავალუტო ფონდისა და მსოფლიო ბანკის მიერ ორგანიზებული ყოველწლიური საგაზაფხულო შეხვედრების ფარგლებში იმყოფებოდა.
დავითაშვილმა განაცხადა, რომ საქართველომ აშშ-სთან „სტრატეგიული თანამშრომლობა ახალი ფურცლიდან უნდა დაიწყოს, ვინაიდან „ორივე ქვეყნის ხელისუფლებას საკმაოდ რთული მემკვიდრეობა ერგო”.
ის აშშ-ში სახელმწიფო მდივნის თანაშემწის მოადგილეს, ჯოშუა ჰაკს შეხვდა.