თამარ გოგალაძე ერთ-ერთია, ვინც მამა-შვილის მკვლელობას შეესწრო და 112-ში, პირველად, სწორედ მან დარეკა. შეტყობინებიდან მალევე სამართალდამცველები და სასწრაფო დახმარების ჯგუფები მობილიზდნენ.
პოლიციას და სასწრაფოს 32 წლის გიორგი ცაციაშვილი გარდაცვლილი, დავით ცაციაშვილი კი უგონო მდგომარეობაში დახვდათ. დაჭრილი კლინიკაში გადაიყვანეს, თუმცა მისი გადარჩენა ექიმებმა ვერ შეძლეს.
პოლიცაიმ დამნაშავის ვინაობა მალევე დაადგინა და 55 წლის მამაკაცი ცხელ კვალზე დააკავა. ის სერგო ახალკაცია, რომელიც მამა-შვილ ცაციაშვილებთან ერთად მუშაობდა.
„კურიერის“ ინფორმაციით, სწორედ ბიზნესი გახდა ნაცნობებს შორის დაპირისპირების მიზეზი. ირკვევა, რომ მამა-შვილ ცაციაშვილებს და სერგო ახალკაცს გორში, სავაჭრო ცენტრ „გალერეაში“ ტანსაცმლის მაღაზიები ჰქონდათ. მკვლელობამდე რამდენიმე წუთით ადრე, ერთმანეთს გასაყიდი ნივთის გამო დაუპირისპირდნენ. კონფლიქტი სავაჭრო ცენტრთან გარეთ გაგრძელდა, რა დროსაც ახალკაცმა რამდენჯერმე გაისროლა.
გავრცელებული ინფორმაციით, თავდაპირველად, დავით ცაციაშვილს რამდენიმე ტყვია გულ-მკერდის და მუცლის არეში მოხვდა. მამის საშველად გამოსულ გიორგი ცაციაშვილს კი, დამნაშავემ, თავში, დამიზნებით ესროლა და ადგილზე მოკლა.
დაკავებული სერგო ახალკაცი ახლა დროებითი მოთავსების იზოლატორშია. დანაშაულის დამტკიცების შემთხვევაში, 50 წლის მამაკაცს, 20 წლამდე, ან უვადო პატიმრობა ემუქრება. წმინდაწყლის დასახლებაში მომხდარი მკვლელობისა და დაჭრის ფაქტზე გამოძიება გრძელდება.