სულხან მოლაშვილი იყო მეშვიდე საპყრობილეში, 4 კვადრატულ მეტრ საკანში, არც ნათურა ჰქონდა, არც საჰაერო და საპირფარეშოში წყალი ჩაედინებოდა 24 საათის განმავლობაში. სააკაშვილის მოთხოვნა იყო, რომ სულხანი უნდა ყოფილიყო გაუსაძლის, გაუბედურებულ მდგომარეობაში, პირადი ზიზღი ჰქონდა მის მიმართ – ამის შესახებ კონტროლის პალატის ყოფილი თავმჯდომარის, პოლიტპატიმარ სულხან მოლაშვილის მეუღლემ, თათია მოლაშვილმა ტელეკომპანია “იმედის” გადაცემაში „იმედი LIVE“ განაცხადა.
როგორც თათია მოლაშვილი იხსენებს, როდესაც ადვოკატმა მეშვიდე საპყრობილეში სულხანის გადაყვანის ამბავი შეატყობინა, მეორე დღეს მის მამამთილს სადილი გაატანა მასთან, მაგრამ უკან დაუბრუნეს.
„შემომითვალეს, მას არ ეკუთვნის არც სადილი, არც წვენი და არც წყალიო. 20 დღე მშიერ-მწყურვალი იყო სულხანი, მიუხედავად იმისა, რომ შიმშილობა არ გამოუცხადებია, ეს იყო იძულებითი. ბადრაგი კართან ედგა, (სააკაშვილს პირადი ზიზღი ჰქონდა სულხანის მიმართ), შუქი არ ჰქონდა, არაფერი არ ჰქონდა და ერთ-ერთმა პატიმარმა ბადრაგი რომ ვერ დაინახა, რომელსაც ხაჭაპური შეუტანეს, სულხანს მიაწოდა, ბადრაგმა მიუსწრო და პირიდან გადმოაყრევინა.
ეს ყველაფერი სააკაშვილის მოთხოვნა იყო, რომ სულხანი უნდა ყოფილიყო გაუსაძლის, გაუბედურებულ მდგომარეობაში არავინ იცის, რა წამალს უკეთებდნენ და რა ხდებოდა მის თავს, რადგან ჩვენ წელიწადი და სამი თვე ის არ გვინახავს. შემდეგ მოგვცეს ნება, რომ თვეში ერთხელ მხოლოდ ორი ზრდასრული და ორი არასრულწლოვანი უნდა შესულიყო მასთან, ამიტომ რიგ-რიგობით შემყავდა ბავშვები და ასევე, რიგ-რიგობით შევდიოდით ჩემი მამამთილი და ძმა…
სულხანს სატელეფონო ზარის უფლება მხოლოდ მას შემდეგ მისცეს, რაც პატიმრობა მიუსაჯეს და ისიც ლიმიტირებული იყო. ეს იყო ტანჯვა სულხანის“, – იხსენებს თათია მოლაშვილი გადაცემაში “იმედი Live”.
https://mix.metronome.ge/22046-2/