კახა კალაძის თქმით, მტკვრის მარცხენა სანაპიროზე ჩამოშლილი სავალი გზის აღდგენის პროცესი მაისის ბოლომდე დასრულდება.
მისი განცხადებით, ამჟამად ადგილზე მიმდინარეობს გეოლოგიური კვლევები, რომლითაც დადგინდება, თუ რა ტიპის კედლის მოწყობა იქნება მიზანშეწონილი.
თბილისის მერი ამბობს, რომ მტკვარი ადიდებულია, რაც მუშაობის პროცესს შედარებით აფერხებს, თუმცა ამის მიუხედავად კალაძე მოქალაქეებს სამუშოების სწრაფად დასრულებას და გზაზე თავისუფალ გადაადგილებას ჰპირდება.
“მტკვრის მარცხენა სანაპიროზე, სადაც გზა ჩამოიშალა, სამუშაოები მიმდინარეობს. პირველ რიგში, მომზადდა სამუშაო მოედანი. გარკვეულ პრობლემებს წარმოადგენს წყალუხვობა. გაზაფხულია და მტკვარი ადიდებულია, რაც გარკვეულწილად, აფერხებს სამუშაოებს. ამ დროისთვის, მიმდინარეობს გეოლოგიური კვლევები, თუ რა ტიპის ხიმინჯოვანი კედელი მოეწყოს. ჩვენთვის მნიშვნელოვანია, სწრაფად დავასრულოთ აღნიშნული სამუშაოები. შესაბამისად, სავალი გზის აღდგენა მაისის ბოლოსთვის დასრულდება და ავტომობილების გადაადგილება თავისუფალი იქნება. რაც შეეხება ხიმინჯოვანი კედლის მოწყობას, სამუშაოების დასრულება დამოკიდებულია წყლის დონეზე” – განაცხადა კალაძემ.
შეგახსენებთ, რომ მტკვრის მარცხენა სანაპიროზე არსებულ გზის სავალი ნაწილის პირველ ზოლსა და საფეხმავლო ბილიკზე რამდენიმე დღის წინ, დაახლოებით, 50-მეტრიან მონაკვეთში ბზარები დაფიქსირდა, რის შემდეგაც გზის ნაწილი ჩამოიშალა.