ავჭალის დასახლებაში, ე.წ ტიტანიკის კორპუსის ლიფტის შახტში ჩავარდნის შედეგად, 13 წლის ბიჭი დაიღუპა.
აღნუშნულს სოციალური ქსელში გამოეხმაურა თბილისის საკრებულოში გლდანის მაჟორიტარი დეპუტატი კოტე ზარნაძე.
„ენით აღუწერელი ტრაგედია დატრიალდა ავჭალაში… გუშინ, ავარიულ კორპუსში მომხდარი უბედური შემთხვევის შედეგად, 13 წლის ბავშვი დაიღუპა.
ამ ამბავზე ლაპარაკი წარმოუდგენელია. საკუთარ თავს ვერ მივცემ უფლებას, ამ ტრაგედიაზე სიტყვა ვთქვა.
ერთადერთი, რაც ახლა შემიძლია ვთქვა: ავჭალაში ე.წ. “ტიტანიკის” კორპუსი 1980-იანი წლებიდან ითვლება ავარიულად. წლებია, ეს პრობლემა დღის წესრიგში დგას და 2015 წლიდან დღემდე, თბილისის მუნიციპალიტეტის მხრიდან არაერთი მცდელობა იყო, რომ იქ მცხოვრები ოჯახები დროებით ქირით გადაგვეყვანა, სანამ მათთვის ახალი კორპუსი აშენდებოდა.
სამწუხაროდ, ამ გადაწყვეტილებას მოსახლეობის სრულ თანხმობას ვერ მივაღწიეთ. თუმცა დღესაც, მუნიციპალიტეტი მზად არის — ხვალიდანვე, სურვილის მქონე ყველა ოჯახი უსაფრთხო გარემოში, ქირით გადაიყვანოს.
ახალი კორპუსის მშენებლობა ჩარგლის ქუჩაზე იგეგმება და პროექტირება მაისის ბოლოს სრულდება, რაც ცნობილია მოსახლეობისთვის და მათგან თანხმობების აღების პროცესი მიმდიმარეობს წერილობით. ეს პროცესი შეუქცევადია და ბოლომდე მივიყვანთ.
კიდევ ერთხელ ხაზგასმით ვამბობ — მუნიციპალიტეტი წლების განმავლობაში ცდილობდა დახმარებას და დღესაც ამ პროცესშია.
გადაწყვეტილება, რომელიც მოსახლეობის უსაფრთხოებას ეხება, დროულად უნდა იქნეს მიღებული. კორპუსი წლებია ავარიულია და მჯერა, მხოლოდ ერთიანი მოქმედებით შევძლებთ ოჯახების უსაფრთხო გადაყვანას და მათთვის ღირსეული საცხოვრებელი პირობების შექმნას.
გულით ვიზიარებ გარდაცვლილი ბავშვის ოჯახის და ახლობლების ტკივილს…“, – წერს ის.