ბათუმში, 26 მაისის ქუჩაზე 5-სართულიანი კორპუსის ნაწილი ჩამოინგრა. არიან დაშავებულები. ადგილზე მობილიზებულია სპეციალური ტექნიკა, სადაც სამაშველო და სასწრაფო დახმარების ბრიგადები მუშაობენ.
სამართალდამცავებმა ტერიტორია სპეციალური ლენტით შემოსაზღვრეს.
არსებული ინფორმაციით, სხვადასხვა რეგიონებიდან ხდება სამაშველო ბრიგადების მობილიზება.
მოჰყვა, თუ არა ინციდენტს მსხვერპლი, ამის შესახებ ინფორმაცია ჯერჯერობით არ ვრცელდება.
ჩამონგრევის ადგილიდან არასრულწლოვანი გამოიყვანეს. ის სასწრაფო-სამედიცინო ბრიგადამ კლინიკაში გადაიყვანა. ბავშვის გადარჩენას ადგილზე შეკრებილი მოსახლეობა ტაშით შეხვდა.
არსებული ინფორმაციით, კორპუსის ჩამონგრევისას არასრულწლოვანი კორპუსთან მდგარ ავტომანქანაში იმყოფებოდა, ხოლო მშობლები ავტომანქანასთან.
ბავშვის ჯანმრთელობის მდგომარეობა ამ დროისთვის უცნობია.
ასევე ვრცელდება ინფორმაცია, რომ ნანგრევებში კიდევ არიან ადამიანები მოყოლილი.
სამაშველო სამსახურის წარმომადგენლებს მიმდებარე სადარბაზოებიდან კორპუსში მცხოვრებლები სახანძრო კიბით გამოყავთ.