აფხაზეთის ავტონომიური რესპუბლიკის განათლებისა და კულტურის მინისტრი, ეკა ხოფერია მასწავლებლის საერთაშორისო დღესთან დაკავშირებით “ფეისბუქის” პირად გვერდზე წერს:
“დიდი პატივი იყო დღეს ჩვენთვის ამ ადამიანებთან შეხვედრა და მათი ღვაწლის დაფასება.
პედაგოგები ჩვენი საყვარელი აფხაზეთიდან, თითოეულის ისტორია ცალკე წიგნია, კინოც და სიუჟეტიც: როგორ მოდიოდნენ პატარა გოგო-ბიჭები სკოლებში, როგორ იწყებდნენ, როგორ ასწავლიდნენ და ზრდიდნენ თაობებს, როგორ გაიარეს ომის წლები… ზოგიერთი მათგანი 2008 წლის აგვისტოს ომამდე მუშაობდა…
ასევე წლის საუკეთესო მასწავლებლები დავაჯილდოვეთ დღეს, ჩვენი იმედი და დასაყრდენი!
და ჩვენი სტიპენდიანტები, ჟიული შარტავას სახელობის სტიპენდიანტები. ეს ახალგაზრდა თაობა აფხაზეთის თემებზე მუშაობს და ახალ ხედვასა და ნაშრომს დებს ამ მიმართულებით. გალის სკოლადამთავრებულებიც მათ შორის. გვინდოდა მასწავლებლებს განსაკუთრებული საჩუქარი დარჩენოდათ ჩვენგან.
არის ასეთი პროექტი – “პოსტერო”- ანბანთქების გრაფიკა. თითოეული მასწავლებლის სახელის პირველი ასოს ამსახველი ანბანთქება ვაჩუქეთ, რომელსაც ისინი მათი ოთახების კედლებზე ჩამოკიდებენ და საყვარელ მოსწავლეებსა და წლებს რომ მოიგონებენ, დიდი იმედი მაქვს, ამ დღესაც პაწაწინა სიყვარულით გაიხსენებენ.
მადლობა დიდი და ყველას, ჩვენს საყვარელ მასწავლებლებს, კიდევ ერთხელ გულით გილოცავთ ამ დღეს “, – წერს ეკა ხოფერია ფეისბუქზე.
ცნობისთვის, აფხაზეთის ავტონომიური რესპუბლიკის განათლებისა და კულტურის სამინისტროში (ვ. არქანიას სახელობის არტ-გალერეაში), მასწავლებლის საერთაშორისო დღესთან დაკავშირებით, აფხაზეთის ღვაწლმოსილი პედაგოგებისა და აფხაზეთის საჯარო სკოლების წლის საუკეთესო მასწავლებლების დაჯილდოება გაიმართა.