საქართველოს საპატრიარქო სოციალურ ქსელში მსოფლიო ბანის, პაატა ბურჭულაძის ინიციატივას ეხმაურება.
„ა.წ. 6 აპრილს, ბ-მა პაატა ბურჭულაძემ კათოლიკოს-პატრიარქისგან ითხოვა კურთხევა, 9 აპრილს სამშობლოსთვის შეწირულთა სულების საოხად და მომხდარი ტრაგედიის გახსენების მიზნით, გამთენიისას ქაშვეთის ეკლესიის ზარები დარეკილიყო; მაგრამ ბ-ნ პაატას ბოლო განცხადებითვე, იგი 8-9 აპრილს აანონსებს თავისი პოლიტიკური ბრძოლის წამოწყებას და აკეთებს მოწოდებებს ამასთან დაკავშირებით. როგორც ჩანს, ზარების დარეკვაც მისთვის, სავარაუდოდ, ამ კონტექსტში მოიაზრება;
მიუხედავად ცალკეული სასულიერო პირებისგან დაფიქსირებული ამა თუ იმ პოზიციისა, ზოგადად, ეკლესია არ არის და არც შეიძლება იყოს რომელიმე პოლიტიკური ძალისადმი მიკერძოებული. მას აქვს მრევლის და, შესაძლებლობის ფარგლებში, ქვეყნის გაერთიანებისთვის ზრუნვის მოვალეობა და საღვთო სწავლების მიხედვით მოქმედების უფლება; ეს ყველამ უნდა გაითვალისწინოს.
1989 წლიდან მოყოლებული, 9 აპრილი გამორჩეულ დღედ იქცა ჩვენი ქვეყნის ცხოვრებაში; ამასთან დაკავშირებით, წელსაც, მისი უწმინდესობისა და უნეტარესობის კურთხევით, ტრადიციისამებრ, გადახდილი იქნება პანაშვიდებიც და პარაკლისებიც როგორც 9 აპრილის მემორიალთან, ასევე ქაშვეთის წმინდა გიორგის სახ. ტაძარში და საქართველოს სხვა ეკლესია-მონასტრებში.
საქართველოს საპატრიარქო“, – აღნიშნულია წერილში.
შეგახსენებთ, ბურჭულაძე გამოვიდა ინიციატივით, 8 აპრილის ღამით მოქალაქეები რუსთაველის გამზირზე, 9 აპრილის მემორიალთან შეკრებილიყვნენ და ღამე გაეთიათ.
ვიდეომიმართვაში პაატა ბურჭულაძემ თქვა, რომ 9 აპრილის ღამის 4 საათზე, ზუსტად იმ დროს, როცა 1989 წელს სისხლიანი დარბევა დაიწყო, მოქალაქეები სანთლებს დაანთებენ, სასულიერო პირი კი 9 აპრილს დაღუპულთა სულის მოსახსენიებელ პანაშვიდს გადაიხდის. ასევე, ამ დროს უნდა დარეკილიყო ქაშვეთის ეკლესიის ზარები.