აშშ-ის სახელმწიფო მდივანმა, მარკო რუბიომ უკრაინაში მშვიდობის დამყარების საკითხზე კიდევ ერთხელ ისაუბრა.
რუბიოს თქმით, მისი განწყობა ოპტიმისტურია, მაგრამ რუსეთი თუ გაჭიანურების ტაქტიკას იყენებს, პრეზიდენტი ტრამპი ამ ხაფანგში არ გაებმება.
„ეს თუ გაჭიანურების ტაქტიკაა, პრეზიდენტი ამით დაინტერესებული არ არის. თუ ეს მოლაპარაკებების უსასრულო გაგრძელებაა, პრეზიდენტი ტრამპი ამ ხაფანგში არ გაებმება. არა მათი სიტყვები, მათი ქმედებები განსაზღვრავს, არიან ისინი სერიოზულები თუ არა. ჩვენ მალე გავიგებთ, სერიოზულად არის თუ არა რუსეთი მშვიდობით დაინტერესებული. თუ ასეა, ეს შესანიშნავი იქნება. მაშინ ჩვენ შეგვიძლია, მშვიდობისკენ ვიმოძრაოთ. თუ არა, მაშინ მოგვიწევს გადავაფასოთ ჩვენი პოზიცია და ის, თუ რა უნდა გავაკეთოთ მომავალში. არის რაღაც დამაიმედებელი ნიშნები. არის რაღაც შემაშფოთებელი ნიშნები. ეს ადვილი არ იქნება. არავის უთქვამს, რომ ეს ადვილი იქნებოდა“, – აღნიშნა რუბიომ.
ამასთან, შტატების სახელმწიფო მდივანმა თქვა, რომ ის რუსეთის პრეზიდენტის სპეციალურ წარმომადგენელს, რუსეთის პირდაპირი ინვესტიციების ფონდის ხელმძღვანელს, კირილ დმიტრიევს შეხვდა.
„კირილი ამ კვირაში გვეწვია, მქონდა შესაძლებლობა, შევხვედროდი. ის წაიღებს გარკვეულ შეტყობინებებს და გზავნილი არის: აშშ-მა უნდა იცოდეს, სერიოზულად ხართ თუ არა განწყობილი მშვიდობის მიმართ. საბოლოოდ, პუტინმა, რუსეთის ფედერაციამ უნდა მიიღოს ეს გადაწყვეტილება. ვფიქრობ, უკრაინელებმა აჩვენეს მზადყოფნა, მაგალითად, დათანხმდნენ სრულ ცეცხლის შეწყვეტას, რათა შეიქმნას სივრცე მოლაპარაკებისთვის. გარკვეულ მომენტში, მალე რუსებმა და პუტინმა უნდა მიიღონ გადაწყვეტილება, სერიოზულად არიან თუ არა განწყობილი მშვიდობისკენ და იმედი მაქვს, რომ ასე იქნება“, – განაცხადა რუბიომ.