კოალიცია „ძლიერი საქართველოს“ ერთ-ერთმა ლიდერმა, სალომე სამადაშვილმა „პალიტრანიუსის“ ეთერში მიმდინარე პოლიტიკური თემების, მათ შორის საქართველოსა და ამერიკის ახალი ადმინისტრაციის ურთიერთობის, შესახებ ისაუბრა.
პოლიტიკოსმა ხაზი გაუსვა, რომ „ქართულმა ოცნებამ“ ვერ გადატვირთა ურთიერთობა ტრამპის ადმინისტრაციასთან. პირიქით – ტრამპის ხელისუფლების წარმომადგენლის გუშინდელი განცხადება საქართველოსთან დაკავშირებით სილის გაწვნა იყო „ოცნებისთვის“, რის შემდეგაც, ამ პარტიას საკუთარი ამომრჩევლისთვის სათქმელი აღარ დარჩა.
ინტერვიუში სამადაშვილმა აღნიშნა, რომ „ქართული ოცნება“ საკუთარ ამომრჩეველს ჭკუასუსტებად თვლის, დაბალი ინტელექტის მქონე ადამიანებად მიიჩნევს და მათ გამოკვებას რუსული პროპაგანდისტული ნარჩენებით ცდილობს, რითაც ძალიან დიდ შეურაცხყოფას აყენებს.
„სამწუხაროდ, არ მიხარია ახლა ამას რომ ვამბობ, მეც შეურაცხყოფილი ვარ, მრცხვენია“, – თქვა სამადაშვილმა.
შეგახსენებთ, 2 აპრილს globalnews.ge – მ გამოაქვეყნა სახელმწიფო დეპარტამენტისგან მიღებული წერილობით პასუხი: „რაც შეეხება „ქართული ოცნების“ მთავრობის მიერ განხორციელებულ განგრძობით ანტიდემოკრატიულ ქმედებებს – როგორც ვიცე-პრეზიდენტმა [ჯეი დი] ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას, ძირითადი ელექტორატის პოზიციის უგულებელყოფით, თუ ვინ უნდა გახდეს ჩვენი საერთო საზოგადოების ნაწილი.“