საქართველოს მესამე პრეზიდენტმა, მიხეილ სააკაშვილმა დღევანდელ სასამართლო პროცესზე სხვადასხვა თემაზე ისაუბრა, მათ შორის, კოალიცია „ძლიერი საქართველოს“ ლიდერ მამუკა ხაზარაძეზე.
„სპეციალურად მოხდა პროცესების გადაფარვა, ხაზარაძე-ბადრი ჯაფარიძის და ჩემი პროცესების, რათა ხალხმა არ გაიგოს სიმართლე. მიუხედავად იმისა, რომ გუშინ ვერაფრით ათქმევინეს მამუკა ხაზარაძეს, რომ მეც პოლიტპატიმარი ვარ, მე მამუკა ხაზარაძე მიმაჩნია პოლიტპატიმრად. პოლიტიკური დევნაა, რაც მის და ბადრი ჯაფარიძის მიმართ ხდება. ისევე როგორც, მინდა, სოლიდარობა გამოვხატო იმ ბიჭებისა და ქალბატონების მიმართ, რომლებიც უკანონოდ, უსამართლოდ ჰყავთ დაკავებული, პოლიტიკური დევნის ქვეშ იმყოფებიან და პოლიტიკური პატიმრები არიან“, – განაცხადა სააკაშვილმა.
შეგახსენებთ, „ნაციონალური მოძრაობის“ ხელისუფლების საქმიანობის შემსწავლელი დროებით საგამოძიებო კომისიაზე გამოუცხადებლობის გამო, პროკურატურამ ხაზარაძეზე საქმე აღძრა.
ცოტა ხნის წინ გავრცელდა ინფორმაცია, რომლის თანახმადაც, პროკურატურა სასამართლოს ხაზარაძისთვის 50 000-ლარიანი გირაოს შეფარდებას თხოვს.