პარტია „დროა“ სოციალური ქსელით საგანგებო განცხადებას ავრცელებს.
ის გუშინდელ აქციაზე საქართველოს მეხუთე პრეზიდენტის, სალომე ზურაბიშვილის მიერ დაანონსებულ „წინააღმდეგობის კომიტეტთან“ თანამშრომლობის საკითხს ეხება.
„პროდასავლური პარტიების შეთანხმებული მუშაობა საქართველოს ეროვნული ინტერესების დასაცავად, პარტია “დროასთვის” ყოველთვის მნიშვნელოვანი იყო.
ჩვენ ვიყავით და ვართ საგარეო ურთიერთობებში ერთობლივი სტრატეგიით მოქმედების, პროტესტის ერთობლივად დაგეგმვის, არათუ მონაწილე, ხშირ შემთხვევაში ინიციატორი. ამ საკითხებზე კოორდინირებულ ძალისხმევას მომავალშიც დავუჭერთ მხარს.
სტრატეგიულ პრობლემად მიგვაჩნია ადგილობრივი თვითმმართველობის არჩევნებში მონაწილეობაზე უარის შესახებ მკაფიო საერთო პოზიციის არარსებობა. ჩვენ ვთვლით, რომ ადგილობრივი არჩევნების ბოიკოტი დღესვე, არის წინ გადადგმული დიდი ნაბიჯი ახალი საპარლამენტო არჩევნების მოსაპოვებლად და ივანიშვილის რეჟიმის საბოლოო დელეგიტიმაციისთვის.
ამ საკითხზე საერთო პოლიტიკური პოზიცია კი უმნიშვნელოვანესია პარტიებს შორის სტრატეგიული ერთიანობის ჩამოყალიბებისთვის.
პარტია დროა – კოალიცია ცვლილებისთვის“, – აღნიშნულია ინფორმაციაში.