მიმდინარე აქციებისას დაკავებული აქტივისტის, საბა სხვიტარიძის დედამ, ელენე ახობაძემ მედიასთან თავისი შვილის ბრალდების შესახებ ისაუბრა.
მისი თქმით, ბრალდება ფარსია.
ახობაძემ ასევე განაცხადა, რომ დაანებონ პოლიტპატიმრებს თავი, სანამ სასწაულს მოახდენენ მათი ოჯახის წევრები. სანამ სასწაული მომხდარა, გამოუშვან. ის „ოცნებას“ აფრთხილებს, რომ ააბუნტებს ყველას.
„ეს ბრალდება ფარსია, ამ უსამართლო სასამართლოში არაფრის იმედი არ მაქვს. ფარსი მოწმეები მოჰყვათ, მოწმეებიც აღიარებენ, რომ ფორმა არ ეცვათ, რომ საბუთი არ წარუდგენიათ. ჩემს შვილს ზიანი ამათმა მიაყენეს, ჩემი შვილი არის ნაწამები სამმართველოში მე-5 სართულზე გამომძიებლის კაბინეტში, შემდეგ მე-8 სართულზე უფროსის კაბინეტში, სადაც “მასკიანი” „ტიტუშკები“ შეიყვანეს და ხელის მოტეხას აპირებდნენ, დაულეწეს თავ-პირი. იქ განუვითარდა ტვინის შერყევა, დაეწყო პირღებინება და ერთადერთი საშველი პოლიეთილენის პარკი იყო, არც ექიმი და არც სასწრაფო. შემდგომ ექიმმა უთხრა ჩემს შვილს, რომ „შენ არაფერი მოგივა, ისინი თავის საქმის სპეციალისტები არიან“ – ექიმმაც უნდა აგოს პასუხი. ვიდეოკამერის ჩანაწერები წაშლილია, რომელზეც იძახიან, რომ არ გვაქვსო.
ასევე პასუხი გამცეს გახარიას პარტიიდან ლილუაშვილმა, რომელიც თქვა, რომ ჩვენ მშობლები მართულები ვართ. მოვიდეს, სასამართლოს დაესწროს და მითხრას, მისი ოჯახის წევრი რომ ასეთი ნაწამები იყოს, თუ იქნებოდა რომელიმე პარტიისგან მართული. მოგვიხადოს ბოდიში! რა უფლებით დაგვწამა ცილი?
მე „ოცნებისგან“ მართული ვარ, გამაღიზიანეს და მატირეს, ჩემი შვილი აწამეს, ამიტომ ვარ მართული და ბრძოლაში ჩაბმული.
ნინო წილოსანს კი გავცემ პასუხს, რომელმაც დაკავებულებს „ხულიგნები“ უწოდა და სახელმწიფო გადატრიალება დააბრალა. სახელმწიფოს ეგ თოჯინა ატრიალებს, თავისი ბოტოქსიანი ტუჩებით. წილოსანიც გამოვიდეს, დაესწროს სასამართლოს და მიპასუხოს, ამის მერე თუ იქნება სრულ ჭკუაზე?! „ტიტუშკები“ კონა 20 თეთრი ღირს, მეც მოვძებნი „ტიტუშკებს“ და ჩამოვუვლი ყველას, თუ უკან არ დაიხევენ, ბოლომდე ვიბრძოლებ, გავამწარებ, როგორც ჩემი შვილი დაჩეჩქვეს, ისე დავჩეჩქვავ მაგათ, სულ ყველას.
დაანებონ პოლიტპატიმრებს თავი, სანამ სასწაულს მოვახდენთ ოჯახის წევრები. სანამ სასწაული მომხდარა გამოუშვან. „ოცნებას“ ვაფრთხილებ, სასწაულის წინაშე დავაყენებ და ავაბუნტებ ყველას“,- განაცხადა ელენე ახობაძემ.
შეგახსენებთ, საბა სხვიტარიძეს ბრალდება სისხლის სამართლის კოდექსის 353-ე პრიმა მუხლის მეორე ნაწილით აქვს წარდგენილი, რაც პოლიციელის ჯანმრთელობის ხელყოფას სამსახურებრივ საქმიანობასთან დაკავშირებით გულისხმობს.
აღნიშნული ქმედება 7-დან 11 წლამდე თავისუფლების აღკვეთას ითვალისწინებს.