„პრაიმტაიმმა“ ექსკლუზიურად მოიპოვა გარდაბნის მუნიციპალიტეტის, სოფელ ფოლადაანთკარში მომხდარი მკვლელობის საქმეზე ბრალდებულის ჩვენება.
საუბარია 29 დეკემბერს მომხდარ მკვლელობაზე, რა დროსაც 40 წლამდე კაცმა მეზობელი ქალი მოკლა მის შვილს კი სიცოცხლისთვის საშიში მძიმე დაზიანებები მიაყენა.
ბრალდებული ჩვენებაში ამბობს, რომ მის მიერ ჩადენილი დანაშაული 14 წლის წინ ოჯახებს შორის მომხდარ დაპირისპირებას უკავშირდება. დაკავებული ჰყვება, რომ მოკლული ქალის შვილი ზ.ყ წლების წინ მამამისს სასტიკად გაუსწორდა, რის გამოც შური იძია.
ბრალდებულის ჩვენება:
„ყოველთვის გულში მქონდა ჩადებული და სულ მღრღნიდა შიგნიდან, როდესაც მახსენდებოდა ნაცემი მამა… გავიდა დაახლოებით 14 წელიწადი, თუმცა ამ 14 წლის მანძილზე მე ყოველდღიურად მახსენდებოდა ნაცემი მამა თუ როგორ გაიმეტა იგი ზ.ყ-მ საცემრად არაფრის გამო. ეს ფიქრები ყოველთვის გულში მქონდა და ვფიქრობდი, რომ აღნიშნულ ოჯახზე მე შურს ვიძიებდი. თუმცა ეს გადაწყვეტილი არ მქონდა როდის იქნებოდა. 2024 წლის 23 დეკემბერს მამა გარდამეცვალა, როდესაც მამა დავასაფლავე მე მას ვუყურებდი და გულში ვ ფიქრობდი, რომ იგი ამ ქვეყნიდან დაჩაგრული წავიდა. ამ ფიქრებმა იმოქმედა ჩემზე. ვუყურებდი დაღუპულ მამას და მახსენდებოდა მისი ნაცემი სახე და ის პერიოდი, როგორ იძალადა ზ.ყ-მ მამაზე. მე დავფიქრდი და მივხვდი, რომ დასაფლავებიდან მეორე დღეს ვერ გადავიტანდი შემდგომ დღეს და განვიზრახე, რომ შური მეძია“