„რია ნოვოსტის“ ცნობით, საუდის არაბეთში, აშშ-სა და რუსეთის დელეგაციების შეხვედრა 12 საათზე მეტხანს გაგრძელდა.
Themoscowtimes -ის ინფორმაციით, მოლაპარაკებებზე რუსეთმა უკრაინის ოთხი რეგიონის – დონეცკის, ლუგანსკის, ზაპოროჟიესა და ხერსონის – ტერიტორიების საკითხი დააყენა.
ოფიციალური მოსკოვის თქმით, ეს რუსეთის მიწებია.
„არ არსებობს რეგიონების ჩვენგან გამიჯვნის კონსტიტუციური მექანიზმი. ჩვენ გვჭირდება მთლიანი ზაპოროჟიე და ხერსონი. ან ტრამპი მოახდენს გავლენას, რომ მათ ტერიტორიები დატოვონ – ან გვეტყვიან: “შედით ხანგრძლივ მოლაპარაკებებში და გამოიყენეთ სამხედრო ძალა კონტროლის დასამყარებლად. ეს ჩვენთვის ყველაზე ცუდი ვარიანტია“, – წერს გამოცემა.
როოგორც Reuters-ი აღნიშნავს, თეთრი სახლის წარმომადგენელმა რუსებს განუცხადა, რომ მხარეებს შორის პროგრესი მიღწეულია და „უახლოეს მომავალში მოსალოდნელია პოზიტიური განცხადებები“.
შეგახსენებთ, ამ მოლაპარაკებებში რუსეთს რუსეთის ფედერაციის საბჭოს საერთაშორისო კომიტეტის ხელმძღვანელი, გრიგორი კარასინი და უსაფრთხოების ფედერალური სამსახურის დირექტორის მრჩეველი, სერგეი ბესედა, ხოლო ამერიკას თეთრი სახლის ეროვნული უსაფრთხოების საბჭოს უფროსი დირექტორი, ენდრიუ პიკი და სახელმწიფო დეპარტამენტის მაღალჩინოსანი, მაიკლ ენტონი წარმოადგენდნენ.