გუშინ „დინამო არენაზე“, ერთა ლიგის პლეი-ოფში, საქართველომ სომხეთი დაამარცხა და B ლიგაში ადგილი შეინარჩუნა.
თამაშის დასრულების შემდეგ, ქართველ გულშემატკივართა ნაწილი მოედანზე შეცვივდა, რასაც სომეხი სტუმრების შეურაცხყოფა მოჰყვა.
აღნიშნულთან დაკავშირებით სოციალურ ქსელში საქართველოს მეხუთე პრეზიდენტმა, სალომე ზურაბიშვილმა, პოსტი გამოაქვეყნა, სადაც სომეხ ხალხს ბოდიში მოუხადა.
ცოტა ხნის წინ, მან კიდევ ერთი პოსტი დაწერა, რომელიც არმენოფობიის პრობლემას ეხება.
„კერძოდ არმენოფობია ან შური ქართველებისადმი, და ზოგადად კავკასიის სახელმწიფოთა და ერთა შორის კონსოლიდაციის მაგივრად დაპირისპირების ხელშეწყობა და პროვოცირება, მუდმივი კონფლიკტის სურათის შექმნა, იყო რუსული იმპერიალიზმის ტრადიციული ბერკეტი“, – აღნიშნავს ზურაბიშვილი.
გუშინ მომხდარ ინციდენტს დიდი გამოხმაურება მოჰყვა როგორც საქართველოში, ისე სომხეთში.
სავარაუდოა, რომ მომხდარის გამო, UEFA-მ საქართველო დასაჯოს.