ჟურნალისტი თამუნა მუსერიძე სოციალურ ქსელში წერს:
“ამ პოსტის მერე ალბათ ბევრი დამიწერთ, რომ ასეთ ხალხს არ უნდა ავყვე, რომ უნდა გავატარო, არ შევიმჩნიო, მაგრამ არა! ვერა! არსებობს რაღაცეები, რასაც ვერ გაატარებ. არსებობს გულისტკენა, რომელიც ესეთი მარტივი ჩასაყლაპი არ არის. ვეცდები მაქსიმალურად დალაგებულად დავწერო, მაგრამ ძალიან განერვიულებული ვარ და შეიძლება აზრები სწორად ვერ დავალაგო.
სიმართლე გითხრათ, ველოდებოდი ჩემი და ჩემი ჯგუფის მიმართ დარტყმას, არც გამკვირვებია ერთი წლის წინ დაწყებული შავი პიარი და ბინძური ბრალდებები. არსებობს პარალელური სამყარო, სადაც ცხოვრობს “სხვა” თამუნა მუსერიძე, რომელიც გაშვილებულ ბავშვებს მშობლების მოძიებაში “ფულს თხოვს”. თუმცა ამდენი ხნის განმავლობაში ერთი ადამიანიც კი არ გამოჩნდა, რომლისთვისაც ფული მაქვს მოთხოვნილი. დროდადრო ჩნდებიან ადამიანები, რომლებიც მსგავს ცილისწამებას “ვიღაცეების” დავალებით წერენ, თუმცა პირად საუბრებში უარყოფენ. ძალიან გთხოვთ, თუ ვინმე ხართ, ვისთვისაც ოდესმე თანხა მომითხოვია, გამოჩნდით და დაწერეთ კომენტარი.
რაც შეეხება ნატოს. ქალს, რომელსაც 3 წელი ზედ გადავყევი, არც ყურადღება დავაკელი, არც დახმარება, მაგრამ სამწუხაროდ ჯერჯერობით მისი მშობლები ვერ ვიპოვე. ალბათ გონიათ, რომ ჯადოსნური ჯოხი მაქვს, რომელსაც დავაქნევ და “დედას” გამოვაჩენ. სამწუხაროდ ამ ხალხს ავიწყდება, რომ თავად ჩემ მშობლებს 8 წელი ვეძებდი და ეს პროცესი მარტივი არ არის.
2 წლის წინ გადაცემა გვქონდა, რომლის დახურვის ამბავიც ალბათ გახსოვთ. ამ გადაცემაშიც იყო ნატო მოსული. სამწუხაროდ აღარ გვქონდა რესურსი, რომ გაგვეგრძელებინა და ამიტომ ვარ მატყუარა, აფერისტი და გამომძალველი. 2021 წლიდან ვეხმარებოდი ნატოს. დავეხმარე საბუთების მოძიებაში, გვარის გაგებაში. ანონიმურად მისი ნათესავი დამიკავშირდა, რომელმაც მითხრა, რომ დაბადების მოწმობაში , მამის გრაფაში თევდორე პოპოვი ეწერა. რამდენიმე თევდორე ვიპოვე, მისამართები მივეცი და მე არ მცალია მისასვლელად, ბავშვი მყავს, იქნებ შენ მიირბინოო. რა თქმა უნდა არ “მივირბინე” და ამის მერე დაიწყო დაუსრულებელი!!
მსგავსი ლანძღვა და ცილისწამება რითი დავიმსახურე ხალხო ამიხსენით?”- წერს მუსერიძე.