საზოგადოებრივი მაუწყებლის ეთერში, თამთა სანიკიძის გადაცემაში „დღის თემა“ ირაკლი კობახიძემ მიმდინარე აქციებისა და ასევე „ნეტგაზეთისა“ და „ბათუმელების“ დამფუძნებლის, მზია ამაღლობელის მიერ ბათუმის პოლიციის ერთ-ერთი ხელმძღვანელისთვის, ირაკლი დგებუაძისთვის სილის გაწვნის ფაქტის შესახებ ისაუბრა.
„ნებისმიერმა აგენტმა შეიძლება სახეში გაარტყას პოლიციის უფროსს და ეს ჩვეულებრივად უნდა გაატარო. დადასტურებულია და ფაქტია, რომ ადამიანი სახეში ხელს ურტყამს პოლიციის უფროსს. სცადეთ, ბერლინში პოლიციის უფროსს გაარტყით ხელი, თუ ვინმე გაკმარებთ მცირე სასჯელს და თუ არ მოგიწევთ პატიმრობაში სისხლის სამართლებრივი მუხლით წასვლა. ერთადერთი ქვეყანა შეიძლება ვიყოთ, სადაც 300 კაცით შეიძლება გადაკეტო ცენტრალური გამზირი და მეორე ერთადერთი ქვეყანა, სადაც შეგიძლია, ნებისმიერმა აგენტმა გაარტყას ხელი პოლიციელს და იქ პატიმრობაც არ უნდა იყოს შეფარდებული. სამარცხვინოა ეს ყველაფერი. შეიძლება პატარა ქვეყანა ვიყოთ და ვიღაც გვიყურებდეს, როგორც დაბალ ღობეს, მაგრამ ყველას უნდა ახსოვდეს, რომ ეს არის დამოუკიდებელი, სუვერენული ქვეყანა, რომელსაც აქვს უფლება კანონის უზენაესობასა და სამართლის უზენაესობაზე, ზუსტად ისევე, როგორც გერმანიის, საფრანგეთისა და აშშ-ის სახელმწიფოებს“, — თქვა კობახიძემ.