თბილისის საქალაქო სასამართლომ ე.წ. კანონიერი ქურდის ძმის, ლევან ჯანგველაძის მკვლელობაში ბრალდებულ გელა უძილაურს აღკვეთი ღონისძიების სახით პატიმრობა შეუფარდა.
ბრალდებული ამ დრომდე დუმილის უფლებას იყენებს. დაცვის მხარე 5 000-ლარიან გირაოს ითხოვდა, ხოლო ბრალდება პატიმრობას. მოსამართლემ უძილაურის ადვოკატის შუამდგომლობა არ დააკმაყოფილა.
უძილაური წარსულში ძალადობრივი ქმედებისთვისაა ნასამართლევი და მის მიმართ პირობითი მსჯავრი იყო გამოყენებული.
შეგახსენებთ, რომ 15 მარტს ჭავჭავაძის გამზირზე მკვლელობა მოხდა. მოგვიანებით გაირკვა, რომ ის ე.წ კანონიერი ქურდის, მერაბ ჯანგველაძის ძმა, ლევან ჯანგველაძეა. მას ჭავჭავაძის გამზირზე, ქვეითთა გადასასვლელთან გელა უძილაურმა რამდენჯერმე ესროლა. ლევან ჯანგველაძე თბილისში რამდენიმე დღით იყო ჩამოსული და ის დაცვის თანხლებით გადაადგილდებოდა.