ჩინური გავლენები, ეკონომიკური დამოკიდებულება და ანაკლიის პორტი – კომუნისტური ჩინეთის გაძლიერება საქართველოში ამერიკული მედიის ყურადღების ცენტრში ექცევა. “ნიუ-იორკ თაიმსი” წერს, რომ ანაკლიის ჩინელებისთვის გადაცემა პოლიტიკაში დიდ არეულობას იწვევს და პორტის მთავარი ბენეფიციარი რუსეთი გახდება. ამერიკულმა გამოცემამ შეისწავლა პროექტები, რომელთა წყალობითაც ჩინეთმა ნელ-ნელა გაიძლიერა გავლენები. ანაკლიის პორტი საბოლოო წითელი ხაზია, აქ ჩინეთის როლი დასავლურ ინტერესებთან სრულ წინააღმდეგობაში მოდის.
ჩინური კომპანიები მოდებული არიან ყველა სტრატეგიულ ობიექტს საქართველოში, ქვეყნის მთავარი მაგისტრალით დაწყებული, რუსეთთან დამაკავშირებელი ახალი გზით დასრულებული. მხოლოდ რიკოთის მშენებლობა 1 მილიარდ დოლარი დაჯდა. ფული, ხშირ შემთხვევაში, საეჭვო რეპუტაციის ჩინურ კომპანიებთან წავიდა, მაგრამ რეალურად პროექტს დასავლური ფონდები აფინანსებენ. ეკონომიკური გავლენები ჩინეთის ხელში პოლიტიკური ზეწოლის მთავარ იარაღად იქცევა ხოლმე, ასეთია გამოცდილება.
ჩინური ინვესტიციები “ოცნების” ხელისუფლების პირობებში გახუთმაგებულია, იზრდება ვაჭრობა და კომპანიების რიცხვი. ახლა მთავარი ანაკლიის პორტია, გეოპოლიტიკურად სტრატეგიული ობიექტი, რომელშიც დასავლურ და ამერიკულ ინვესტიციებს უსაფრთხოების გარანტიების მოტანა შეეძლო. პორტის ჩინეთის ხელში აღმოჩენა კი პირიქით, საქართველოს უსაფრთხოების რუკის მიღმა ტოვებს. ეს მხოლოდ ოკუპანტი რუსეთის ინტერესებშია.
ჩინური გავლენები საქართველოში – დეტალები ნახეთ ლიკა ჯანყარაშვილის რეპორტაჟში.