პარლამენტთან შეკრებილი მოქალაქეები საპროტესტო მსვლელობით საზოგადოებრივ მაუწყებელთან მივიდნენ – პროტესტის რეჟიმში გადასულმა ადამიანებმა ეს გადაწყვეტილება მას შემდეგ მიიღეს, რაც პირველ არხთან ხმაური იყო.
საზოგადოებრივ მაუწყებელთან ამ წუთებში კახა კინწურაშვილიც იმყოფება. მსახიობი სტატუსშეჩერებულ სტუდენტებს სოლიდარობას უცხადებს და თეატრალური უნივერსიტეტის რექტორს ახალგაზრდებთან დიალოგისკენ მოუწოდებს.
საქმე აქამდე არ უნდა მიეყვანა. სტუდენტების ღირსებას უნდა გაფრთხილებოდა. რასაც ახლა აკეთებს, რა ფორმითაც აკეთებს, ეს არ არის სწორი. ეს არ გაუკეთებია არავის და სამწუხაროდ, უნივერსიტეტს ამ ნაბიჯებით ღირსება შეელახა. აქ მხოლოდ რაღაც ინსტიტუციაზე საუბარი არ არის. აქ საუბარია ახალგაზრდებზე, რომლებიც მომავალია ქართული თეატრის და კინოსი. ამას უნდა გაფრთხილებოდა. ყველას მოეთხოვება თავის ქმედებაზე პასუხი. აქ არიან სტუდენტები და ითხოვენ მასთან დიალოგს. თუ ის პირდაპირ ეთერში ზის, რატომ ვერ გაბედა, რომ სტუდენტებთან ერთად დამჯდარიყო”. – განაცხადა კახა კინწურაშვილმა.
ცნობისთვის, რამდენიმე წუთის წინ საზოგადოებრივ მაუწყებელთან ხმაური იყო – გიორგი შალუტაშვილის ეთერში სტუმრობის პარალელურად, პირველ არხთან შეკრებილი თეატრალური უნივერსიტეტის სტუდენტები ეთერის დათმობას ითხოვდნენ. ახალგაზრდები ამბობდნენ, რომ თეატრალური უნივერსიტეტის რექტორი პირდაპირი ეთერის საშუალებით დეზინფორმაციას ავრცელებს, სწორედ ამიტომ ახალგაზრდები სტუდიაში შესვლას და ფაქტებზე დაყრდნობით საუბარს მოითხოვდნენ.
შეგასენებთ, რომ თეატრალური უნივერსიტეტის სტუდენტური მოძრაობის ცნობით, პროტესტში მონაწილე სტუდენტების ნაწილს უნივერსიტეტმა სტუდენტის სტატუსი შეუჩერა.
ისინი სოციალურ ქსელში მეილს აქვეყნებენ, სადაც ნათქვამია, რომ კომისიამ “ეთიკის კოდექსით გათვალისწინებული ნორმების დარღვევის საკითხი” განიხილა და სტუდენტის სტატუსის შეწყვეტა გადაწყვიტა.