ჩემპიონთა ლიგის საპასუხო მერვედფინალურ მატჩში პარი სენ-ჟერმენი ლივერპულს “ენფილდზე” ესტუმრა. მატჩამდე პრესკონფერენცია პსჟ-ს მთავარმა მწვრთნელმა ლუის ენრიკემ, ხვიჩა კვარაცხელიასთან ერთად გამართა.
კვარამ პარი სენ-ჟერმენის ადაპტაციის პერიოდსა და გუნდთან ინტეგრირებაზე ისაუბრა:
„რთული თამაში გველის, მაგრამ ამისთვის მზად ვართ. ვეცდებით, ხასიათი გამოვავლინოთ. „ენფილდზე“ გამოსვლა ბევრის ოცნებაა და ყველაფერს გავაკეთებთ, რათა სასურველ შედეგს მივაღწიოთ. შანსები თანაბარია. „ლივერპულთან“ დომინაცია ადვილი არაა, თუმცა გასულ კვირას ჩვენ ეს შევძელით. ხვალ აქაც გვეყოლება გულშემატკივარი, ეს კი ძალიან ბევრს ნიშნავს.
მე ამ გუნდის ერთადერთი მოთამაშე არ ვარ, ვისაც „ენფილდზე“ თამაშის გამოცდილება აქვს. ჩვენს გუნდში ბევრმა იცის აქ არსებული ატმოსფეროსა და გულშემატკივრების შესახებ.
ისე უნდა ვითამაშოთ, როგორც პარიზში და ვფიქრობ, ყველაფერი შესაძლებელი იქნება. ეს სეზონის ყველაზე მნიშვნელოვანი მატჩია, პსჟ-ის მიზანი ჩემპიონთა ლიგის მოგებაა, ხოლო ამისთვის ჯერ მეოთხედფინალში უნდა გავიდეთ.
ადაპტაცია? პსჟ-ში თავს შესანიშნავად ვგრძნობ. ადაპტაცია კარგად მიმდინარეობს, ყველა მეხმარება და ვფიქრობ, კიდევ უფრო მეტი შემიძლია. ვმუშაობ, რომ უკეთესი და უკეთესი ვიყო ვცდილობ, ფეხბურთით სიამოვნება მივიღო და ლამაზი მომენტები შევქმნა. თუმცა ფეხბურთი მხოლოდ ლამაზი მომენტები არაა – ჩვენი მიზანი ტიტულების მოპოვებაა.
ბევრს ვმუშაობ, რათა გუნდს მეტი წარმატება მოვუტანო. შეტევაში ვარ და მიზანი მხოლოდ გოლების გატანაა. არ აქვს მნიშვნელობა, რომელ პოზიციაზე ვითამაშებ, მთავარია, გუნდს წარმატების მიღწევაში დავეხმარო“, – განაცხადა კვარაცხელიამ.
შეგახსენებთ, რომ გასულ კვირას უეფა-ს ჩემპიონთა ლიგის მერვედფინალური ეტაპის პირველ შეხვედრაში „ლივერპულმა“ პსჟ სტუმრად 1:0 დაამარცხა. განმეორებითი შეხვედრა ინგლისელთა საშინაო არენაზე ხვალ, 11 მარტს, თბილისის დროით 23:59 საათზე დაიწყება.