გიორგი მამარდაშვილის „ვალენსიამ“, რომელიც ლა ლიგაში დარჩენისთვის იბრძვის, ერთ-ერთ აუტსაიდერს, „ვალიადოლიდს“ უმასპინძლა და უმნიშვნელოვანესი გამარჯვება მოიპოვა – 2:1.
„მესტალიაზე“ გამართულ ესპანეთის ლა ლიგის 27-ე ტურის დაპირისპირებაში ქართველი მეკარე მასპინძელთა ძირითად შემადგენლობაში იყო. მე-7 წუთზე ანგარიში დიეგო ლოპესმა გახსნა და „ვალენსია“ დააწინაურა, მაგრამ შესვენებამდე სტუმრებმა წონასწორობის აღდგენა შეძლეს – მე-40 წუთზე ხუან ლატასამ ქართველი მეკარის შეცდომით ისარგებლა.
58-ე წუთზე უმარ სადიქმა „ვალენსია“ ისევ წინ გაიყვანა. მამარდაშვილმა 61-ე წუთზე ხუან ლატასას დუბლის შესრულების შანსი არ მისცა, ხოლო სამ წუთში ისევ მის თავურ დარტყმას გადაეღობა.
“მამარდაშვილის მაღალ დონეში ეჭვი არ მეპარება. ის ძალიან განიცდის, რომ ასეთი შეცდომა დაუშვა და მეტოქემ ანგარიში გაათანაბრა.
თუმცა უნდა აღვნიშნო, რომ მეორე ტაიმში დამაჯერებელი იყო. მან გუნდი დაამშვიდა და სტაბილურად იდგა. ვაფასებ მის უნარს და ვიცი, რომ მსგავსი მომენტების დაძლევა შეუძლია” – განაცხადა ვალენსიას მწვრთნელმა.