დღეს ნიკა მელიას პარლამენტმა უფლებამოსილება შეუწყვიტა. 88 მომხრე და არც ერთი წინააღმდეგი – ასეთია კენჭისყრის შედეგი.
„პრაიმტაიმი“ პარლამენტარების გადაწყვეტილების შესაფასებლად ნიკა მელიას მამას, ანზორ მელიას დაუკავშირდა.
– რა მნიშვნელობა აქვს, ნიკა მელია პარლამენტარი იქნება თუ არა, ის საქართველოს პატრიოტია და ყოველთვის სიმართლისთვის იბრძოლებს, ნებისმიერი პლატფორმიდან. ახლა უფრო თავისუფალი იქნება თავის ქმედებებში და უფრო მეტს შეძლებს, გააკეთოს საქართველოსთვის. მოგეხსენებათ, პარლამენტში როგორი დეპუტატები არიან წარმოდგენილი! სირცხვილია, ერთი ადამიანიც რომ მონას მეძახდეს, მე რომ პარლამენტის წევრი ვიყო, ერთი წუთითაც არ შევიდოდი პარლამენტში,- ამბობს ნიკა მელიას მამა.
მისივე თქმით, ნიკა სააკაშვილის მონა კი არა, საქართველოს შვილია.
„ნიკა ის პიროვნება იყო, რომელიც ჩემთან ერთად იდგა იპოდრომზე, მიშა სააკაშვილის წინააღმდეგ. კიდევ სხვა აქციებზეც ვიდექით. ნიკა სააკაშვილის მონა კი არა, საქართველოს შვილია. ის ძალიან პატიოსანი და ობიექტურია. თქვენ არ იცით და ბევრმა არ იცის, რომ ის სააკაშვილსაც ეწინააღმდეგებოდა. მეც ახლა გავიგე, რომ როცა აღსრულების ეროვნული ბიუროს უფროსად მუშაობდა, თურმე ერთადერთი პიროვნება იყო, თათბირზე ადეიშვილს რომ შეუბრუნებდა სიტყვას“, – განაცხადა ანზორ მელიამ.
კითხვაზე, მოსწონს თუ არა მამას შვილის ბრძოლის მეთოდები, ანზორ მელია პასუხობს, რომ ის ამიერიდან ნიკასთან ერთად ჩაერთვება ბრძოლაში.
„მე ჩავერთვები ბრძოლაში მასთან ერთად. მინდა გითხრათ, რომ 2012 წელს მე „ოცნებას“ ვუჭერდი მხარს და ამის გამო ნიკასთან უთანხმოება მქონდა. იმიტომ ვუჭერდი მხარს, რომ არ მინდოდა, სასამართლო ყოფილიყო ვიღაცაზე დამოკიდებული, მინდოდა, რომ ქართველი ხალხი ყოფილიყო თავისუფალი, არ ყოფილიყო ამდენი დაჭერები და ნარკოტიკების ჩადებები.
– აღიარებთ, რომ წინა ხელისუფლების დროს ეს ხდებოდა?
– ისინი კარგ საქმესაც აკეთებდნენ და როცა დავინახე, რომ „ოცნებამ“ ის წარმატებები, რაც „ნაციონალურ მოძრაობას“ ჰქონდა, კი არ განავითარა, არამედ, რაც ცუდი ჰქონდათ, ის კუბში აიყვანა, ამიტომ გადავუდექი. ნიკას ვამართლებ, ნეტავ ნიკასნაირი 100 კაცი მაინც იყოს საქართველოში და საქართველოს ეშველება. არ მეკადრება მამას, შვილის ქება, მაგრამ ნიკა არის ჯანსაღი და სუფთა პიროვნება. როცა ვხედავ, ვინ არიან პარლამენტში, ეს მონები, კაცობა რომ არა აქვთ, რა თქმა უნდა, მხარს ვუჭერ ნიკას. მალე იქნება ამათი დასასრული. 2020 წელი არც ისე შორს არის, – განაცხადა ანზორ მელიამ „პრაიმტაიმთან“ საუბრისას.
წყარო: primetime.ge
1,074 ნახვა
