გუშინ, “ქართული ოცნების” ერთ-ერთი ლიდერი მამუკა მდინარაძე პარტიის ოფისში გამართულ ბრიფინგზე მისი თანაგუნდელის, ირაკლი კობახიძისა და ნიკა მელიას დაპირისპირებას გამოეხმაურა.
როგორც მდინარაძემ აღნიშნა, მელიამ “პროვოკაცია მოაწყო” და “დედის გინება გამოსტყუა” ირაკლი კობახიძეს, რომლისგანაც აქამდე გინება “არასდროს გაუგია”.
“თქვენ წარმოიდგინეთ, ირაკლი კობახიძეს, რომელთან ერთადაც დილიდან საღამომდე შტაბში ერთად ვართ, რომლის გინებაც მე არ გამიგია, გამოსტყუა დედის გინება. წარმოიდგინეთ, სადამდე მიიყვანა ეს გაწონასწორებული ადამიანი, დედის გინება გამოსტყუა. უმძიმესია”, – განაცხადა მდინარაძემ.
მამუკა მდინარაძის აღნიშნულ განცხადებას ჟურნალისტი ვახო სანაია “ფეისბუქის” პირად გვერდზე ეხმიანება:
“მამუკა მდინარაძე, რატომ იტყუები? პარლამენტში ტელევიზიის დირექტორს ნაბიჭვარი რომ უწოდა, ეგ დალოცვა იყო ?!” – მიმართავს სანაია “ქართული ოცნების” ერთ-ერთი ლიდერს.
„ქართული ოცნების“ თავმჯდომარე ირაკლი კობახიძე და „ნაციონალური მოძრაობის“ ლიდერი ნიკა მელია ერთმანეთს მწვავედ დაუპირისპირდნენ. დაპირისპირება ევროკავშირის ოფისთან მოხდა.
როდესაც ირაკლი კობახიძე მედიასთან კომენტარს აკეთებდა, ევროკავშირის წარმომადგენლობის ოფისში შეხვედრაზე მისულმა ნიკა მელიამ და ირაკლი კობახიძე დმანისში მომხდარ ფაქტთან დაკავშირებით გაკეთებული კომენტარების გამო გააკრიტიკა, რამაც ხმაური და დაპირისპირება გამოიწვია.