საგანგებო სიტუაციების მართვის სამსახურის ინფორმაციით, ბათუმში, იროდიონ მეტაქსის ქუჩაზე, ავარიული საცხოვრებელი სახლის კედელი ჩამოინგრა, სადაც ორი ადამიანი იმყოფებოდა. მაშველებმა ორივე მოქალაქე ნანგრევებიდან გამოიყვანეს და ახლა ისინი სამედიცინო დაწესებულებაში არიან გადაყვანილები. როგორც საგანგებო განმარტავს, მათ სიცოცხლეს საფრთხე არ ემუქრება.
“შინაგან საქმეთა სამინისტროს გადაუდებელი დახმარების ოპერატიულ მართვის ცენტრ „112“-ში შემოვიდა შეტყობინება, რომ ქალაქ ბათუმში, იროდიონ მეტაქსის ქუჩაზე, ჩამოინგრა ავარიული საცხოვრებელი სახლის კედელი და მოქალაქეები ვერ ახერხებენ გამოსვლას.
შეტყობინების მიღებისთანავე, ადგილზე დაუყოვნებლივ გამოცხადდნენ საგანგებო სიტუაციების მართვის სამსახურის მეხანძრე-მაშველთა ჯგუფები და სხვა ყველა შესაბამისი სამსახურის წარმომადგენლები.
ადგილზე მისვლისას გაირკვა, რომ ჩამონგრეული იყო ორსართულიანი ბარაკული ტიპის საცხოვრებელი სახლი , სადაც მოყოლილი იყო ორი მოქალაქე.
მაშველებმა სწრაფი რეაგირების შედეგად, ორივე მოქალაქის ნანგრევებიდან გამოყვანა მოახერხეს. ისინი კონტაქტური მდგომარეობით, სასწრაფო სამედიცინო დახმარების ჯგუფის მიერ სამედიცინო დაწესებულებაში არიან მოთავსებულები.
მათ სიცოცხლეს საფრთხე არ ემუქრება.” აცხადებს უწყება.