ორი დღის წინ, პოლიტიკიდან ბიზნესში წასულმა ირაკლი ალასანიამ „რადიო თავისუფლებასთან“ სტუმრობისას განაცხადა, რომ სააკაშვილის მთავრობის პერიოდთან შედარებით, დღეს ბიზნესი თავისუფალია. „ქართული ოცნება“ ბიზნესმენებს არ ატერორებს, მათგან არც წილების გადაფორმებას ითხოვს და არც ციხეში იჭერს.
რაც შეეხება რუსთაველის გამზირზე მიმდინარე პროტესტს, ექსმინისტრმა განაცხადა, რომ დროა, მხარეები მოლაპარაკების მაგიდასთან დასხდნენ და ოპოზიციამ ახალი არჩევნებისთვის მზადება დაიწყოს.
“პირდაპირი ზეწოლა ბიზნესზე, ციხეში საკუთრებების გადაფორმება, ბიზნესმენების დაბარებები და ასეთი რამ ამ ხელისუფლების პერიოდში არ გამიგია” – ალასანია
გუშინ, სხვადასხვა ირაკლი ალასანიას ინტერვიუდან სწორედ ამ ჰედლაინებზე გააკეთეს აქცენტი, რისი წაკითხვის შემდეგაც, მწერალი ლაშა ბუღაძე უკმაყოფილო დარჩა. ბუღაძემ სოციალურ ქსელში ვრცელი სტატუსი გამოაქვეყნა, სადაც წერს, რომ წაკითხულმა შოკში ჩააგდო.
– ალასანიას ინტერვიუს წაკითხვის შემდეგ კიდევ უფრო შოკში ჩამაგდო სიტუაციური კარიერისტების და უპასუხისმგებლო პოლიტიკანების “კატის მეხსიერებამ” – ინდულგენცია რომ გახდა ახლა ივანიშვილის ოპონირება და წლების წინ კი მისი ძალაუფლების არმხილება და განმტკიცება, რომ იყო ქცევის ნორმა. ამჟამინდელი და ტრადიციულად ანტი ქოცური ოპოზიციის წარმომადგენლები ნიშნისგებით ბრაზობენ – ჩვენ ვიბრძოდით და ოპოზიციად ახლა ეგენი ითვლებიანო. ჰოდა, ჩვენო ძვირფასებო, უპასუხისმგებლოებო, ნაწყენებო, ფულით ნაყიდნო, გადაგდებულნო თუ გაუყიდავებო, ახლა ყველა ერთ დიდ უბედურებაში ვართ და ის მაინც გააკეთეთ, რომ ყოველ საღამოს რუსთაველის გადაკეტვაში მიეშველოთ ხალხს!