თბილისის მუნიციპალიტეტის მთავრობის სხდომაზე დედაქალაქის მერმა, კახა კალაძემ რუსთაველის გამზირის რეაბილიტაციის შესახებ ისაუბრა.
მისი თქმით, სამუშაოები მაისში დაიწყება.
„როგორც იცით, ჩვენ ვგეგმავთ რუსთაველის გამზირის განახლებას. გზა არის ამორტიზებული, მძიმე მდგომარეობაში, ხშირია დაზიანებები, გზის ჩავარდნის შემთხვევები იმის გამო, რომ მიწისქვეშა ინფრასტრუქტურა მძიმე მდგომარეობაშია. სამუშაოების დაწყებას რაც შეეხება, ალბათ მაისის თვეში დავიწყეთ პროექტის განხორციელებას და ზაფხულის ბოლოსთვის გვინდა რომ სრულიად დავამთავროთ”,- განაცხადა კახა კალაძემ.
აღსანიშნავია, რომ თბილისის მერიამ რუსთაველის გამზირის დაანონსებული რეაბილიტაციის ფარგლებში 4 ტენდერი 2024 წლის 24 დეკემბერს გამოაცხადა, რომლის ჯამური ღირებულება 28 440 411 ლარი იყო. წინადადებების მიღება 14 იანვარს დასრულდა.
პრეტენდენტის არ არსებობის გამო ვერ შედგა 8.7 მილიონიანი ტენდერი, რომელიც ალ. ჭავჭავაძის ქუჩიდან ზ. ჭიჭინაძის ქუჩის ჩათვლით გზის მონაკვეთის რეაბილიტაციას მოიცავდა.
ასევე, იმავე მიზეზით ჩავარდა 6.8 მლნ-ს ღირებულების ტენდერი ზ. ჭიჭინაძის ქუჩიდან თავისუფლების მოედნამდე გზის მონაკვეთის რეაბილიტაციას გულისხმობდა.
4.3 მლნ-ს [თ. ჭოველიძის ქუჩიდან მ/ს „რუსთაველი“-მდე გზის მონაკვეთის რეაბილიტაცია] და 8.4 მლნ-ს [მეტროსადგურ რუსთაველიდან ალ. ჭავჭავაძის ქუჩის ჩათვლით მონაკვეთის რეაბილიტაცია] ტენდერების შემთხვევაში პრეტენდენტი მხოლოდ ერთი კომპანია შპს დინ გრუპია. ახლა, შერჩევა/შეფასების პროცესი მიმდინარეობს.
ამ საკითხზე კახა კალაძემ თქვა, რომ ორ ტენდერზე გარკვეული შეუსაბამობები იყო და ამის გამო კომპანიებმა ვერ მიიღეს მონაწილეობა.
“თუმცა, ხელახლა ჩატარდება და გამარჯვებული კომპანიებიც გვეყოლება“, – განაცხადა კალაძემ.