„30 დღის შემდგომ, ეს [შიმშილობა] არის ძალიან დიდი რისკი სხვადასხვა ორგანოების ფუნქციის მოშლის“ – ზურაბ ჩხაიძე მზია ამაღლობელზე

„ვივამედის“ დირექტორმა, ზურაბ ჩხაიძემ „ნეტგაზეთისა“ და „ბათუმელების“ დამფუძნებლის, მზია ამაღლობელის ჯანმრთელობის მდგომარეობის შესახებ ისაუბრა.

„ხანგრძლივ შიმშილობის პროცესი არის ძალიან რთული ფიზიოლოგიური პროცესი და გაგრძელებული შიმშილობის ყოველი დღე დაკავშირებულია რეალურ შესაბამის გართულებასთან – ეს არის ნახშირწყლოვანი წვა, ცხიმების წვა, ცილების წვა და შინაგანი რესურსების გამოყენება, რაც იწვევს კარდიო ვასკულარულ გართულებებს, სხვადასხვა ორგანოების ფუნქციების მოშლას და ა.შ. კლინიკა რა თქმა უნდა, მზადაა და ყოველდღიურად ახორციელებს მონიტორინგის პროცესს. მას აქვს ყველა ის დამახასიათებელი სიმპტომი, რაც უკავშირდება ამ ხანგრძლივ შიმშილობას 31 დღის განმავლობაში.
რა თქმა უნდა, [გადაადგილება] არაა მისთვის მარტივი, თუმცა ცდილობს გადაადგილდეს და უფრო აქტიური იყოს და იმოძრაოს. მინდა ხაზი გავუსვა იმას, რომ ყოველი შემდგომი დღე განსაკუთრებით 30 დღის შემდგომ, ეს არის ძალიან დიდი რისკი სხვადასხვა ორგანოების ფუნქციის მოშლის და გართულებების“, — თქვა ჩხაიძემ.

შეგახსენებთ, მზია ამაღლობელი, 32-ე დღეა, შიმშილობს.
ის 11 იანვარს, ბათუმში დააკავეს. ბათუმის საქალაქო სასამართლომ მას აღკვეთის ღონისძიების სახით პატიმრობა შეუფარდა.
მზია ამაღლობელს ბრალი სისხლის სამართლის კოდექსის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს. მას 4-დან 7 წლამდე პატიმრობა ემუქრება.