“მთავარი არხის” გენერალური დირექტორი ნიკა გვარამია სოციალური ქსელის მეშვეობით პარტია “საქართველოსთვის” თბილისის მერობის კანდიდატ, გიორგი გახარიას მიმართავს:
“ბატონო გახარია,
ჯერ ერთი, გინდა ნაცმოძრაობის, გინდა მელიას და გინდა ვისიც გნებავთ ტერიტორიად მთავარი არხის გამოცხადება, სამარცხვინოა და ირაკლი კობახიძის და ვოლსკის კლასიკა. და ისევ მანდ თუ ხართ, არ ვიცი.
მეორე, ჩემთან პირისპირ ინტერვიუს, რომელიც პრაქტიკულად შეთანხმებული იყო 19 სექტემბერს, დებატებით ვერ ჩაანაცვლებთ. თუ არ მოდიხართ, გასაგები იქნება, რომ ვერ ბედავთ, ისევე როგორც ვერ ბედავს კალაძე. ასე რომ, ამ მხრივ თქვენს შორის არანაირი განსხვავება არ იქნება, ისევე როგორც, ზემო პუნქტში აღნიშნულ შემთხვევაში – თქვენსა და კობახიძეს შორის.
დებატებს რაც შეეხება, ძალიაან თუ გინდათ ჩვენს არხზე გამოჩნდეთ ნიკა მელიას ფონზე, ნამდვილად არაა პრობლემა. უბრალოდ, ჩემთან ინტერვიუზე მოსვლის შიშს ეგ ვერ იხსნის. ჩათვლას ვერ მიიღებთ მოკლედ
გმადლობთ ყურადღებისთვის,” – წერს გვარამია “ფეისბუქის” პირად გვერდზე.
შეგახსენებთ, რომ გიორგი გახარია კახა კალაძეს დებატებს „ტელე-იმედში“, ნიკა მელიას კი, „მთავარ არხზე“ სთავაზობს.
მისი განცხადებით, დებატები ყველა დემოკრატიულ ქვეყანაში არჩევნების განუყოფელი ნაწილია და ერთადერთი შესაძლებლობაა, პატივი სცენ ამომრჩევლებს, რათა მიიღონ ინფორმირებული და სწორი გადაწყვეტილება.
მანამდე, მმართელი გუნდის თბილისის მერობის კახა კალაძემ განმარტა, რომ დებატებისთვის მზად არის. მან საზოგადოებასა და ოპონენტებს ასევე შესთავაზა სასურველი ტელევიზია.
„ნაციონალური მოძრაობის“ თავმჯდომარე, თბილისის მერობის კანდიდატი ნიკა მელია აცხადებს, რომ ნებისმიერ კანდიდატთან, ნებისმიერ ფორმატში იდებატებს.
მისივე თქმით, მერობის ყველა კანდიდატი ვალდებულია, დებატებში მიიღოს მონაწილეობა.