თბილისის მერის კახა კალაძის განცხადებით, საზოგადოებრივი ტრანსპორტის მუშაობის განახლებასთან ერთად, მნიშვნელოვანია, მოქალაქეებმა ტრანსპორტში რეგულაციები დაიცვან.
მისივე თქმით, საზოგადოებრივი ტრანსპორტი არ დაიძვრება ადგილიდან, თუ მგზავრი პირბადის გარეშე იქნება,
„ტრანსპორტზე რეგულაციებს, რაც მოთხოვნილი იყო, მაქსიმალურად დავიცავთ, არც ერთი საზოგადოებრივი ტრანსპორტი არ დაიძვრება, თუ მგზავრი პირბადის გარეშე იქნება. ამის ბევრი მაგალითებიც გვქონდა. ძალიან დიდი უკმაყოფილებაც გამოიწვია საზოგადოებაში, რადგან იყვნენ ისეთი ადამიანები, რომლებიც მიზანმიმართულად არ იკეთებდნენ პირბადეს, რათა საზოგადოებრივი ტრანსპორტის მუშაობა შეეზღუდათ. ავტობუსები რაც ჰყავს დედაქალაქს, ყველა გაშვებულია ხაზზე და ემსახურება თბილისს“, – განაცხადა დედაქალაქის მერმა.
ქვეყანაში მუნიციპალურმა ტრანსპორტმა მუშაობა დღეიდან განაახლა. აღდგა როგორც მეტროს, ისე ავტობუსებისა და მიკროავტობუსების მოძრაობა.
საზოგადოებრივი ტრანსპორტის მოძრაობა გართულებული ეპიდემიოლოგიური ვითარების გამო იყო შეჩერებული.