მიმდინარე აქციებისას დაკავებული ნიკოლოზ ჯავახიშვილის ადვოკატმა, გუჯა ავსაჯანიშვილმა „პუბლიკას” მიაწოდა წერილი, სადაც ბრალდებული საუბრობს, რომ მასთან შევიდა ვინმე დავითი, რომელიც ჯავახიშვილს ბრალის აღიარებაში არწმუნებდა.
„ჩემთან 7 თებერვალს შემოსული იყო ვინმე დავით გამყრელიძე. გამეცნო, როგორც ადვოკატი,რომელიც არ იყო ჩემი ოჯახის მიერ დაქირავებული ან შემოგზავნილი. დაახლოებით ნახევარი საათის განმავლობაში მარწმუნებდა, მეღიარებინა ის დანაშაული, რომელიც არ ჩამიდენია და სხვებისთვის დამედო ხელი. რა თქმა უნდა, მან ჩემი დარწმუნება ვერ შეძლო. ასეთი არაკაცური საქიცელის ჩადენის და ტყუილად დანაშაულის თავზე დაბრალების, როცა მსგავსი არაფერი ჩამიდენია. არ ვიცი, რა მოტივაცია ჰქონდა ამ ადამიანს ან რა განზრახვა ამოძრავებდა”, – აღნიშნულია ნიკოლოზ ჯავახიშვილის მიერ ციხიდან გამოგზავნილ წერილში.
შეგახსენებთ, დღეს ანდრო ჭიჭინაძის დედამ, ლიკა გუნცაძემ, ბლოგერმა დოდი ხარხელმა და ჟურნალისტმა ნანუკა ჟორჟოლიანმა გაავრცელეს ინფორმაციები, რომ ადვოკატი დავით გამყრელიძე შედიოდა პატიმრებთან და მათ, ბრალის აღიარებაში არღწუმებდა და ამის სანაცვლოდ, საპროცესოს გაფორმებას სთავაზობდა.
ამასთან, facebook-ჯგუფ „დაიტოვეში“ ადვოკატმა გიჯა ავსაჯანიშვილმა დაწერა: „მოშიმშილე ნიკოლოზ ჯავახიშვილთან შევიდა ადვოკატი დავით გამყრელიძე🤮 ოჯახთან შეუთანხმებლად(რაც კანონის დარღვევა)და სთხოვდა ეღიარებინა დანაშაული და ხელი დაედო ბიჭებისთვის ეს იმფო მომაწოდა ჩემა დაცვის ქვეშმყოფმა მაქვს მტკიცებულებაც ‼️‼️‼️ “.
შეგახსენებთ, ნიკოლოზ ჯავახიშვილი რამდენიმე დღეა, შიმშილობს.
ის ჯგუფური ძალადობის ბრალდებითაა დაკავებული. მას 4-დან 6-წლამდე თავისუფლების აღკვეთა ემუქრება.