მიმდინარე აქციებისას დაკავებული იუმორისტი, ონისე ცხადაძე ციხიდან წერილს ავრცელებს.
„როცა საკუთარი თავი ვიპოვე და ყოველდღიურად ჩემი შესაძლებლობების მაქსიმუმისკენ მივიწევდი, ზუსტად მაშინ აღმოვჩნდი აქ. მაგრამ არ ვდარდობ.
სიცოცხლის ფასადაც კი მიღირს იმ რეალობასთან ბრძოლა, სადაც გოგა ხაინდრავა მოღალატეებს გვეძახის იმედის ეთერში და, მომდევნო დღეს, იგივე ეთერში, იმავეს იმეორებს ზვიად გამსახურდიას შვილი.(ზვიადი, ალბათ, ამ დროში, საკუთარ შვილს დაუძახებდა KGB-ს აგენტს, ცოცხალი რომ იყოს).
საკანში ყოფნა მირჩევნია იმ რეალობასთან შეგუებას, სადაც შალვა რამიშვილი უზნეოებს გვეძახის, ამ დროს კი საკუთარ შვილსაც არ უყვარს.
ამ დროს კი, შალვასთან ერთად განათლებას გვიწუნებს სოკრატე სულთანიშვილი და არისტოტელე ოდიშარია.
ვისაც გსურთ ამ რეალობასთან შეგუება, კი ბატონო, მაგრამ ჩვენ არ ვეგუებით. რამდენი ხანიც არ უნდა მომიწიოს აქ ყოფნა, ვიცი რომ თავისუფალ საქართველოში შევხვდებით.
ავისრულებ ჩემს ოცნებას და მსოფლიო გამიცნობს.
ხო და, კიდევ, ყველაზე მთავარია მზია ამაღლობელი! ❤️”“
ონისე ცხადაძე
გლდანის ციხე
30.01.2025“, – აღნიშნულია წერილში.
შეგახსენებთ, ონისე ცხადაძეს ბრალი საქართველოს სისხლის სამართლის კოდექსის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს. მუხლი სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.