ახალციხის მუნიციპალიტეტის მერიის მიერ დაფუძნებული ახალი ა(ა)იპ „სკოლისგარეშე სახელოვნებო – საგანმანათლებლო დაწესებულება – წმ. სერაპიონ ზარზმელის სახელობის აკადემია – ზარზმის“ დირექტორად დაინიშნა არქიმანდრიტი ნიკოლოზ (ერისკაცობაში ვლადიმერ) გეწაძე, რომელსაც საპატრიარქოს ზნეობის კომისიამ მღვდელმოქმედება შეუჩერა მას შემდეგ, რაც გოგოებმა ის სექსუალურ შევიწროებაში ამხილეს.
საჯარო რეესტრზე არქიმანდრიტის ა(ა)იპ–ის დირექტორად დანიშვნის შესახებ გადაწყვეტილება 26 დეკემბერს მიიღეს.
რამდენად მიზანშეწონილია საგანმანათლებლო დაწესებულებაში არქიმანდრიტ ნიკოლოზ გეწაძის ყოფნა ხელმძღვანელ პოზიციაზე, კითხვით ახალციხის მუნიციპალიტეტის მერიას დავუკავშირდით.
მერიის საზოგადოებასთან ურთიერთობის სამსახურში განგვიცხადეს, რომ ააპი-ი ჯერ არ ფუნქციონირებს. ჩვენს სხვა კითხვებზე კი კომენტარი არ გააკეთეს.
ცნობისთვის, საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე „სამხრეთის კარიბჭეს“ უდასტურებს, რომ არქიმანდრიტ ნიკოლოზ გეწაძეს მღვდელმოქმედება შეჩერებული აქვს.
ზარზმის მამათა მონასტრის წინამძღვარს, არქიმანდრიტ ნიკოლოზ გეწაძეს, ახალგაზრდა ქალები სექსუალურ შევიწროვებაში ადანაშაულებენ. სამი მათგანი „სამხრეთის კარიბჭეს“ უყვება, როგორ სთავაზობდა მოძღვარი, აღსარების ჩაბარების დროს, სექსუალურ ურთიერთობას. ანდრია ჯაღმაიძის ინფორმაციით, ნიკოლოზ გეწაძე ახალგაზრდა ქალების მიერ მონაყოლს არ აღიარებს. არქიმანდრიტის სულიერმა შვილმა, ნიკოლოზ ბერიძემ „სამხრეთის კარიბჭეს“ გადასცა აუდიო მასალა, სადაც მისი თქმით, სასულიერო პირი ჩადენილ ქმედებას აღიარებს.
წყარო:sknews.ge