სახალხო დამცველის, ლევან იოსელიანის თქმით, “ნეტგაზეთისა” და “ბათუმელების” დამფუძნებლის, მზია ამაღლობელის წარმომადგენელმა აპარატს, კონკრეტული ექიმებით, კონსილიუმის შექმნა სთხოვა.
“პალიტრანიუსის” ეთერში მან განაცხადა, რომ პროცედურა დაწყებულია და მისი მანდატით ექიმები ამაღლობელის მოსანახულებლად შევლენ.
“ჩვენ კონსილიუმის შექმნა მხარემ მოგვთხოვა. ეს არ არის საია-ს მიერ დაორგანიზებული. ქალბატონი მზიას წარმომადგენელმა გვთხოვა კონსილიუმის შექმნა და წარმოგვიდგინა კონკრეტული ექიმები. ეს პროცედურა დაიწყო. ჩვენ მათ ვთხოვეთ, შესაბამისი დოკუმენტაცია წარმოედგინათ, ძალიან პატივსაცემი ექიმები არიან, მაგრამ ჩვენ ფორმალურად უნდა დავრწმუნდეთ, რომ აქვთ შესაბამისი ლიცენზია. ეს პროცესი მალე დასრულდება.
თუ როდის შევა ექიმთა ჯგუფი მოსანახულებლად, მთლიანად დამოკიდებულია მათზე. რა თქმა უნდა, ჩემი მანდატით შევლენ მის მოსანახულებლად. ჩვენ ამ პროცესში ჩართულები ვიქნებით”, – თქვა იოსელიანმა.
ამაღლობელი 25 დღეა, შიმშილობს. ის გამოკვლევებისთვის კლინიკა “ვივამედშია” გადაყვანილი.