ქართული ფილმების მოყვარულებს ცხადია, არ დაგავიწყდებოდათ შესანიშნავი ტანდემის: დიდი შემოქმედების: რეჟისორ გურამ პატარაიას, ოპერატორ ირაკლი ონოფრიშვილის და კომპოზიტორ – გია ყანჩელის მუსიკით დამშვენებული დაუვიწყარი სატელევიზიო მხატვრული ფილმი “რეკორდი“ და მისი ახალგაზრდა “რეკორდსმენი“, შოუზე შეყვარებული ჯოტია, ვის როლსაც ფილმში არაპროფესიონალი მსახიობი კობა ღვინიაშვილი შესანიშნავად ასრულებს.
“შემაგინე და გესვრი!“ – ეს ახალგაზრდა ჯოტიას დაუვიწყარი ფრაზაა, სხვაგვარად მისი ნატყორცნი ქვა მდინარეს ვერ გადაუფრენდა და რეკორდსაც ვერ დაამყარებდა.
ბატონი კობას გარდაცვალების ამბავი წუხელ შევიტყვე “ფეისბუქიდან” და ძალიან მეტკინა გული…
წლების განმავლობაში “საზოგადოებრივ მაუწყებელში“ ერთად ვმუშაობდით, ერთხანს ჩვენი მძღოლიც იყო – კვირაში ერთხელ, დილაადრიან, ერთსაათიანი პირდაპირი რადიოეთერი გვქონდა მე და ჩემს ორ კოლეგას და ბატონი კობა შინ გვაკითხავდა ხოლმე, სამსახურში წასაყვანად. ვიცოდი, ჩემს სახლთან ახლოს რომ ცხოვრობდა, მანამდე ქუჩაშიც მხვდებოდა ხოლმე. ძალიან მოკრძალებული ადამიანი იყო, ბევრს არ ლაპარაკობდა, თუმცა მოსალმება კი გულიანი იცოდა.