“გვაპატიე მეც და მამასაც”- ბათუმში დაკარგული ბიჭის დედა ახალ მიმართვას ავრცელებს

ბათუმში დაკარგული ბიჭის დედა, ნათია დიაკვნიშვილი სოციალურ ქსელში მორიგ პოსტს აქვეყნებს, რომლითაც შვილს მიმართავს.

„დეე, ჩემო გულის და სულის ნაწილო, ჩემო სიყვარულო, ჩემო ბედნიერება, ჩემო ღვთის საჩუქარო, ჩემო სიამაყე და ჩემო ყველა ფერო…! იცი, როგორ მჭირდები? აი, როგორც ადამიანს არსებობისთვის წყალი და ჟანგბადი…!!! ამას თუ იმაზე მეტ ხანს ვერ მიიღებს ადამიანი, უბრალოდ ვერ იცოცხლებს. მუხლდაჩოქილი გემუდარები დეე, მოდი, ჩამეხუტე და მომეცი ძალა, რომ ვისუნთქო… უკიდეგანოდ მჭირდები და მენატრები… დამირეკე და ხმა მაინც გამაგონე, დეე. გამაგონე შენი როხროხა ხმა, დეე.

…დეე, ჩემო სუნთქვა, თუ იმის გამო გიჭირს მოსვლა, რომ კითხვები იქნება და ვინმე ვერ გაგიგებს, არ იდარდო. არაფერი გაგიკეთებია ისეთი, რომ გიჭირდეს მოსვლა. შენ კი არა, ჩვენ გვაპატიე თუ რამე ისე ვერ გავაკეთეთ, როგორც შენ გულს გაუხარდება. გვაპატიე მეც და მამასაც, ოღონდ შენ მოდი დეეე. შენი და შენი ძმების სიცოცხლეზე ძვირფასი და მნიშვნელოვანი არაფერია, დეეე “, – წერს ნათია დიაკვნიშვილი სოციალურ ქსელში.

ბათუმში დაკარგულ ალექსანდრე მიქელაძეს ამ დრომდე ეძებენ. ბიჭი 16 იანვარს, ღამით 22:00 საათიდან გაუჩინარდა.