თბილისი მერობის კანდიდატების მხრიდან ნარკოტესტის ჩაბარების საკითხს, ჟურნალისტი ვახო სანაია “ფეისბუქის” პირად გვერდზე ეხმაურება:
“მე რა მენაღვლება, მაგრამ კალაძესა და კობახიძეს რისი თქმა უნდათ ჩვენთვის – რომ ჰყავდათ პრემიერი, რომელიც თანამდებობაზე ყოფნის დროსაც კაიფობდა თუ მათთან განშორება ვერ გადაიტანა და მერე შეჯდა ნარკოტიკზე?! – წერს სანაია სოციალურ ქსელში.
ცნობისთვის, 6 სექტემბერს, “ქართული ოცნების” თბილისის მერობის კანდიდატმა, კახა კალაძემ ნარკოტესტი ჩააბარა, მიღებული პასუხის შემდეგ თქვა, რომ “ყველანაირად სუფთაა” და ოპონენტებს იმავეს გაკეთებისკენ მოუწოდა.
კალაძის მოწოდებას მმართველი გუნდის თავმჯდომარე, ირაკლი კობახიძე შეუერთდა. მისი თქმით, ყველა კანდიდატმა ტესტი “დაუყოვნებლივ” უნდა ჩააბაროს.
“რა შუაშია გიორგი გახარია?!” – ასე უპასუხა დედაქალაქის მერმა ჟურნალისტის შეკითხვას, რატომ ჩააბარა მან ნარკოტესტი მხოლოდ მას შემდეგ, რაც მერობის კანდიდატურა ექს-პრემიერმა დააყენა, როგორც კალაძემ განაცხადა, მას არასდროს უთქვამს, რომ კონკრეტულად ვინმესთან დაკავშირებით ეჭვი აქვს.
“მოგისმენიათ ჩემგან რამე, რომ თითქოს მე ვინმესთან დაკავშირებით ეჭვები მაქვს? არ არსებობს ბუნებაში ეგეთი რაღაც. გიორგი გახარიაზე გაქვთ ძირითადი აქცენტი გაკეთებული, რა შუაშია გიორგი გახარია, თუ იცით რამე გვითხარით”,- განუცხადა კალაძემ ჟურნალისტებს.
გახარიას გუნდის წევრები კალაძის ინიციატივასა და ამ თემაზე განცხადებებს სპეკულაციებს უწოდებენ.