საქართველოში ცნობილი მართლმადიდებელი თეოლოგი და ფილოსოფოსი ანდრეი კურაევი არ შემოუშვეს. ინფორმაციას “ფორმულა” ავრცელებს.
ცნობილია, რომ კურაევი საქართველოში სულხან-საბა ორბელიანის უნივერსიტეტის მოწვევით ჩამოვიდა, რადგან 5 თებერვალს ლექცია უნდა ჰქონოდა, თუმცა ის საზღვარზე შეაჩერეს და პასპორტი ჩამოართვეს.
“ფორმულას” ცნობით, თეოლოგს საზღვარზე გადასცეს საბუთი, რომლის თანახმადაც, მას საქართველოში შემოსვლა 3 წლით აეკრძალა. საბუთში წერია, რომ კურაევი “არ აკმაყოფილებს საქართველოს კანონმდებლობით განსაზღვრულ სხვა მოთხოვნებს”, რა იგულისხმება ამ მოთხოვნებში უცნობია.
ანდრეი კურაევი რუსეთის სახელმწიფოსა და მართლმადიდებელი ეკლესიის მიერ დევნილია. ის რუსეთის პატრიარქ კირილთან დაპირისპირებული პირია, რომელმაც მღვდელმსახურება შეუწყვიტა, ხოლო უკრაინაში რუსეთის შეჭრის შემდეგ მან ქვეყანა დატოვა, რის შემდეგაც კონსტანტინოპოლის საპატრიარქოში გადავიდა.