თბილისი მოლთან აქციაზე დაკავებული არასრულწლოვანის, ნიკოლოზ გველუკაშვილის და, სალომე ნატროშვილი “მთავარი არხის” ეთერში საუბრობს სამართალდამცველების მხრიდან სასტიკი მოპყრობის ფაქტებზე და ამბობს, რომ ნიკოლოზს ფიზიკურად გაუსწორდნენ, რის შედეგადაც გონება დაკარგა.
“ნიკოლოზს ფიზიკურად გაუსწორდნენ ძალიან სასტიკად, მას სტკივა კიდურები და უჭირს გადაადგილება. ასევე, მუცლის ღრუში მიიღო ძალიან სერიოზული დაზიანება და როგორც აღწერს, იმდენად მტკივნეული იყო, განსაკუთრებით მუცელში მიყენებული დარტყმები, რომ ჰქონდა გონების კარგვის ეპიზოდი.
ზოგადადაც ისეთი სტრესული იყო მთელი ეს პროცესი მისთვის, რომ ცალკეულ შინაარს ვერ იხსენებს. მას აქვს ეს ემოციური ფონი დამცირებულობისა და შეურაცხყოფის. ე.წ. სამარშრუტო ტრანსპორტში მას აყენებდნენ შეურაცხყოფას, დამამცირებელ ეპითეტებს იყენებდნენ მისი მისამართით და ცდილობდნენ მის დაშინებას, თუმცა ნიკოლოზის არ ეშინია, არ ეშინიათ არც მისი ოჯახის წევრებს და ჩვენ გავაგრძელებთ კანონიერ და ჯანსაღ წინააღმდეგობას იმისთვის, რომ გვეცხოვრებოდეს ამ ქვეყანაში.
ჩვენთვის ცხადია, რომ ფაქტობრივი ძალაუფლების მფლობელი ცდილობს საზოგადოების ნაწილი გააძევოს ამ ქვეყნიდან, ან დააკარგვინოს ბრძოლის მოტივაცია და მინდა ვთქვა, რომ ეს ყველაფერი ჩვენ პირიქით, გვაძლიერებს. […] არამხოლოდ ფიზიკურად გაუსწორდნენ ბავშვს, რომელსაც დღეს გადაადგილების პრობლემა აქვს. მას წაართვეს პირადი ნივთები, სმარტფონი, სმარტსაათი და ფული, გაძარცვეს”. – აცხადებს არასრულწლოვნის და.
რას ამბობს საპროტესტო აქციაზე დაკავებული არასრულწლოვნის, ნიკოლოზ გველუკაშვილის და
